WT20 WC: यजमान दक्षिण आफ्रिकेने रचला इतिहास! रोमहर्षक उपांत्य फेरीत इंग्लंडला चारली धूळ

England vs South Africa Women's T20 WC : यजमान दक्षिण आफ्रिकन महिला संघाने शुक्रवारी येथे झालेल्या उपांत्य फेरीच्या लढतीत माजी विजेत्या इंग्लंड संघावर ६ धावांनी विजय मिळवला आणि पहिल्यांदाच टी-२० विश्‍वकरंडकाच्या अंतिम फेरीत धडक मारली. आता येत्या रविवारी जेतेपदाच्या लढतीत दक्षिण आफ्रिकन संघासमोर पाच वेळा विश्‍वविजेत्या ठरलेल्या ऑस्ट्रेलियाचे आव्हान असणार आहे.

दक्षिण आफ्रिकेकडून इंग्लंडसमोर १६५ धावांचे आव्हान ठेवण्यात आले. शबनीम इस्माईल, अयाबोंगा खाका व नदीन क्लार्क यांनी प्रभावी कामगिरी करीत इंग्लंडच्या फलंदाजांना बांधून ठेवले. डॅनी वॅटने ३४ धावांची, सोफीया डंकले हिने २८ धावांचीखेळी साकारली. अयाबोंगा खाका हिने अव्वल दर्जाची गोलंदाजी करताना २९ धावा देत ४ फलंदाजांना पॅव्हेलियनचा रस्ता दाखवला.

याआधी दक्षिण आफ्रिकन संघाने नाणेफेक जिंकून प्रथम फलंदाजी करण्याचा निर्णय घेतला. लॉरा वोलवॉर्डट्‌ व ताझमिन ब्रिटस्‌ या सलामी जोडीने पहिल्या विकेटसाठी ९६ धावांची भागीदारी करताना संघाला जबरदस्त सुरुवात करून दिली.

संक्षिप्त धावफलक : दक्षिण आफ्रिका - २० षटकांत ४ बाद १६४ धावा (लॉरा वोलवॉर्डट्‌ ५३, ताझमिन ब्रिटस्‌ ६८, मेरीझॅन कॅप नाबाद २७, सोफी एक्लेस्टोन ३/२२) विजयी वि. इंग्लंड २० षटकांत ८ बाद १५८ धावा (डॅनी वॅट ३४, सोफीया डंकले २८, नॅट सीव्हर ४०, हेथर नाईट ३१, अयाबोंगा खाका ४/२९, शबनीम इस्माईल ३/२७).