गृहोपयोगी वस्तूंच्या किंमती वाढणार; जाणून घ्या काय आहेत कारणं?

नवी दिल्ली : गृहपयोगी इलेक्ट्रॉनिक वस्तूंच्या (Consumer Durables) किंमती नव्या वर्षात पाच ते दहा टक्क्यांनी वाढणार आहेत. त्यामुळं तुम्ही जर फ्रीज, वॉशिंग मशिन, एअर कंडिशन किंवा तर इलेक्ट्रॉनिक वस्तू (Electronics Items) घेण्याचा विचार करत असाल तर काही दिवसांत या वस्तू महागण्याची शक्यता आहे. या वस्तूंच्या किंमतीत वाढ होण्यामागे काय कारणं आहेत तसेच कधीपासून ही किंमतवाढ होईल याबाबत सविस्तर जाणून घेऊयात. (Household prices will rise in new year Know what are the reasons)

कधीपासून होईल किंमतीत वाढ?

पॅनासोनिक (Panasonic), एलजी (LG), हायर (Haier) या कंपन्यांनी आपल्या गृहोपयोगी वस्तूंच्या किंमतीत बदल केला असून यामध्ये वाढ केली आहे. तर इतर प्रसिद्ध कंपन्या जसं सोनी (Sony), हिताची (Hitachi), गोदरेज (Godrej) या कंपन्या आपल्या प्रॉडक्ट्सच्या किंमती वाढवण्याबाबत या तिमाहीच्या शेवटापर्यंत निर्णय घेऊ शकतात.

वस्तूंच्या किंमतीत किती टक्के होणार वाढ?

कन्झुमर इलेक्ट्रॉनिक्स अँड अल्पायन्सेस मॅन्युफॅक्चर्स असोसिएशनच्या (CEAMA) माहितीनुसार, या क्षेत्रामध्ये वस्तूंच्या किंमतीत जानेवारी ते मार्च महिन्यांपर्यंत वाढ होणार आहे. ही वाढ पाच ते सात टक्क्यांपर्यंत होऊ शकते, असा अंदाजही या संघटनेनं व्यक्त केला आहे.

किंमती वाढण्याचं कारण काय?

"वस्तूंची किंमत, जागतिक मालवाहतूक आणि कच्चा मालाच्या किंमतीत अभूतपूर्व वाढ झाल्यानं आम्ही आमच्या टीव्ही, फ्रीज, वॉशिंग मशिन आणि एअर कंडिशन प्रकारातील इलेक्ट्रॉनिक्स वस्तूंच्या किंमती तीन ते पाच टक्क्यांनी वाढवण्याचा निर्णय घेतला आहे," अशी माहिती हायर अप्लायन्सेस इंडियाचे अध्यक्ष सतिश एन. एस. यांनी पीटीआयशी बोलताना सांगितलं.

पॅनासोनिक कंपनीनं आधीच आपल्या वस्तूंच्या किंमती ८ टक्क्यांनी वाढवल्या आहेत. यामागचं कारण सांगताना पॅनासोनिक इंडिया प्रादेशिक संचालकांनी सांगितलं की, "कच्च्या मालाच्या किंमतीतील वाढ आणि वितरण व्यवस्थेतील दरवाढ यांमुळं आम्ही आमच्या एअर कंडिशनच्या किंमतीत ८ टक्क्यांनी वाढ केली आहे. त्याचबरोबर येत्या काळात आम्ही आमच्या इतर होम अप्लायन्सेसच्या किंमतीही वाढवणार आहोत"

साऊथ कोरियाची महत्वाची कंपनी असलेल्या एलजी इलेक्ट्रॉनिक्स इंडियाचे उपाध्यक्ष दीपक बन्सल यांनी म्हटलं की, "आम्ही आमच्या होम अप्लायन्सेस प्रकारातील वस्तूंच्या किंमती वाढवल्या आहेत. कच्च्या मालाच्या किंमतीत सातत्यानं होत असलेली वाढ आणि वाहतुकीचा खर्च या गोष्टी यासाठी कारणीभूत आहेत"