Raj Thackeray : ''त्यांना मुख्यमंत्रीपद हवं होतं म्हणून ते मोदींवर टीका करतायत'' कणकवलीतून राज ठाकरेंचा उद्धव ठाकरेंवर निशाणा

सिंधुदुर्गः केंद्रीय मंत्री नारायण राणे हे रत्नागिरी-सिंधुदुर्ग मतदारसंघातून भाजपचे उमेदवार म्हणून निवडणुकीच्या रिंगणात उभे आहेत. राणेंच्या प्रचारसभेसाठी मनसेचे अध्यक्ष राज ठाकरे यांची कणकवली येथे उपस्थिती होती. यावेळी राज ठाकरेंनी मोदींच्या समर्थनामागचं कारण सांगून उद्धव ठाकरेंवर टीका केली आणि नारायण राणेंना मत देण्याचं आवाहन केलं.

राज ठाकरे म्हणाले की, आजपर्यंत महाराष्ट्राला ९ भारतरत्न मिळालेले आहेत. त्यापैकी सात भारतरत्न कोकणाच्या वाट्याला आलेले आहेत. त्यातलेही चार भारतरत्न एकट्या दापोलीमधले आहेत. त्यामुळे हा मतदारसंघ सुसंस्कृत मतदारसंघ आहे.

बदललेल्या भूमिकेबद्दल बोलताना राज ठाकरे म्हणाले की, मला एखादी गोष्ट पटली तर पटली, नाही पटली तर नाही पटली. नरेंद्र मोदींच्या अनेक गोष्टी मला तेव्हा पटल्या नव्हत्या. त्या आजही पटत नाहीत. अशा बाबतीत आपण मोकळं असणं आवश्यक आहे. ज्या पटल्या त्याचं जाहीर कौतुक करणारा मी माणूस आहे.

''३७० कलम रद्द करण्याच्या निर्णयाचं मी कौतुक केलेलं आहे. ते तुम्हाला मान्य करावंच लागेल. यापूर्वीच्या कितीतरी सरकारांनी आश्वासनं दिली होती. परंतु नरेंद्र मोदींच्या सरकारने ते करुन दाखवलं. आताचे काही लोक मुख्यमंत्री पद हवं होतं म्हणून विरोध करत होते. परंतु माझं वेगळं होतं. मला भूमिका पटली नव्हती म्हणून मी विरोध केला होता. समजा तुम्हाला भाजपने अडीच वर्षे मुख्यमंत्रीपद दिलं असतं तर उद्धव ठाकरे आज जे बोलत आहात, ते बोलला असतात का?नक्कीच नसता बोललात.'' असं म्हणत राज ठाकरेंनी उद्धव ठाकरेंवर निशाणा साधला.

राज ठाकरे पुढे म्हणाले की, भाजपने उद्योग गुजरातला नेले म्हणतात. मागच्या दहा वर्षातले साडेसात वर्षे उद्धव ठाकरे सत्तेत होते, त्याचवेळी ते सत्तेतून का बाहेर गेले नाहीत? स्वतःच्या फायद्यासाठी राजकारण करायचं आणि नुकसान झालं की टीका करायची.

नारायण राणेंचं कौतुक

''नारायण राणेंनी ज्या पद्धतीने मुख्यमंत्रीपद सांभाळले ते भल्याभल्यांनाही जमलं नव्हतं. एखादा विषय कसा समजून घ्यायचा, तो कसा सोडवायचा.. याची हातोटी राणेंकडे आहे. नुसताच बाकड्यावर जावून बसणारा खासदार पाहिजे की केंद्रामध्ये मंत्री होऊन विकास करणारा खासदार पाहिजे? असा प्रश्न राज यांनी उपस्थित केला.