Navneet Rana: हनुमान चालिसा प्रकरण; राणा दाम्पत्याला कोर्टात हजर राहण्याचे निर्देश

मुंबई : तत्कालीन मुख्यमंत्री उद्धव ठाकरे यांच्या निवासस्थानी हनुमान चालीसा पठन करण्याचा अट्टहास करणाऱ्या राणा दाम्पत्याविरोधात गुन्हा दाखल झाला आहे. या प्रकरणी आरोप निश्चितीसाठी सत्र न्यायालयात सुनावणी सुरू आहे. आज न्यायालयात सुनावणीवेळी अनुपस्थित राहिल्यानं राणा दाम्पत्याला ९ मे रोजी हजर राहण्याचे निर्देश न्यायालयाने दिले आहेत. (Navneet Rana Hanuman Chalisa case Rana couple directed to appear in mumbai court)

अमरावतीतील भाजपच्या उमेदवार नवनीत राणा व त्यांचे पती बडनेराचे आमदार रवी राणा यांनी एप्रिल २०२२ मध्ये उद्धव ठाकरे यांच्या मातोश्री निवासस्थानी हनुमान चालीसा पठणचा प्रयत्न करून मोठा गोंधळ निर्माण केला होता. यातून त्यांनी सामाजिक वातावरण कलुषित केल्याचा त्यांच्यावर आरोप आहे. (Latest Marathi News)

या प्रकरणी दोघांनी दोषमुक्ततेसाठी कोर्टात अर्ज केला होता मात्र, सत्र न्यायालयाने तो फेटाळला. त्यानंतर आता आरोप निश्चितीसाठी सत्र न्यायालयात सुनावणी सुरू असून आज न्या. राहुल रोकडे यांच्या समोर या प्रकरणी सुनावणी पार पडली. (Marathi Tajya Batmya)

अमरावतीत आज (ता.२६) मतदान असल्यानं राणा दाम्पत्यानं न्यायालयात हजेरीपासून सूट द्यावी असा अर्ज अॅड. शब्बीर शोरा यांच्यामार्फत केला होता. मतदानाचं कारण विचारात घेत न्यायालयानं दाम्पत्याला एक दिवस गैरहजर राहण्याची मुभा दिली. पण आता ९ मेच्या सुनावणीला हजर राहण्याचे निर्देश देत सुनावणी तहकूब केली.