Loksabha Election Voting : मतदानासाठी उद्या कामगारांना पगारी सुट्टी

पुणे : जिल्ह्यात बारामती लोकसभा मतदारसंघासाठी मंगळवारी (ता. ७) मतदान होत आहे. त्यामुळे मतदारसंघातील सर्व आस्थापनांनी कामगारांना मतदानासाठी भरपगारी सुट्टी द्यावी, असा आदेश जिल्हाधिकारी डॉ. सुहास दिवसे यांनी दिला आहे. तसेच नागरिकांनी मतदान केंद्राची माहिती घेऊन मतदानाचा हक्क बजावावा, असे आवाहन त्यांनी केले आहे.

बारामती लोकसभा मतदारसंघात दौंड, इंदापूर, बारामती, पुरंदर, भोर आणि खडकवासला असे सहा विधानसभा मतदारसंघ आहेत. भोर विधानसभा मतदारसंघात म्हाळुंगे, सूस, बावधन बुद्रूक, ताथवडे, हिंजवडी, पिरंगुट, माण, भुकूम, भूगाव, लवळे; तर खडकवासला विधानसभा मतदारसंघात कात्रज, धायरी, नऱ्हे, वडगाव बुद्रूक, वारजे, शिवणे खडकवासला, खेड शिवापूर, बिबवेवाडी (काही भाग) या शहरी भागाचा समावेश आहे. या भागातील मतदारांना मतदान करता यावे, यासाठी मतदानाच्या दिवशी सुट्टी जाहीर केली आहे.

बारामती मतदारसंघातील ग्रामीण भागासह शहराशी संलग्न भागात उद्योग, ऊर्जा व कामगार विभागाअंतर्गत सर्व आस्थापना, कारखाने, खासगी कंपन्या, दुकाने, निवासी हॉटेल, खाद्यगृहे, नाट्यगृहे, व्यापार, औद्योगिक उपक्रम, माहिती व तंत्रज्ञान कंपन्या, खरेदी केंद्रे, मॉल, किरकोळ विक्रेते आदी ठिकाणी कार्यरत अधिकारी, कर्मचाऱ्यांना भरपगारी सुट्टी देऊन मतदान करण्यासाठी प्रोत्साहित करावे, असे आवाहन दिवसे यांनी केले आहे.

माहितीसाठी सहाय्यता कक्षाशी संपर्क साधा

मतदान केंद्राच्या माहितीसाठी मतदान केंद्र किंवा मतदान सहायता कक्षाशी संपर्क साधावा. निवडणूक आयोगाच्या https://electoralsearch.eci.gov.in/pollingstation या लिंकवर जाऊन आपल्या मतदान केंद्राविषयी माहिती घेता येईल. वोटर हेल्पलाइन ॲपवरही मतदान केंद्राची माहिती घेता येईल.