Prajwal Revanna: "रेवन्ना प्रकरणी प्रधानमंत्र्यांनी 'त्या' पीडित महिलांची माफी मागावी"; राहुल गांधींची मागणी

शिवमोग्गा : अनेक महिलांचं शोषण केल्यानं आणि याचे हजारो व्हिडिओ लीक झाल्यानं प्रज्वल रेवन्ना हे नाव सध्या देशभरात चर्चेत आलं आहे. प्रज्वल रेवन्ना हे माजी पंतप्रधान एचडी देवैगौडा यांचे नातू असून सध्या जेडीएसचे खासदार आहेत.

पण यंदा रेवन्ना पुन्हा एकदा लोकसभेच्या रिंगणात असून प्रधानमंत्री मोदींनी स्वतः यांचा प्रचार केला होता. त्यामुळं आता भाजप आणि मोदी देखील अडचणीत आले आहेत. यापार्श्वभूमीवर राहुल गांधींनी मोदींना टार्गेट केलं आहे. (Prajwal Revanna case PM Modi should apologize to victims women demanded Rahul Gandhi at Shivmogga)

राहुल गांधी प्रचारानिमित्त सध्या कर्नाटकातील शिवमोग्गा इथं आले होते. यावेळी त्यांना प्रज्वल रेवन्नााबाबत पत्रकारांनी प्रश्न विचारला. यावर उत्तर देताना राहुल गांधी म्हणाले, या ठिकाणी सर्वात मोठा इश्यू हा आहे की इथं जी रेवन्ना केस आहे. या रेवन्नानं मोठ्या प्रमाणावर महिलांवर अत्याचार केले आहेत, ४०० महिलांवर त्यानं अत्याचार केले आहेत. या व्यक्तीचा प्रधानमंत्र्यांनी प्रचार केला आहे. याचं उत्तर आणि त्या पीडित महिलांची माफी प्रधानमंत्र्यांनी मागितली पाहिजे.