Sanjay Shirsat : राऊतांमुळे उद्धव ठाकरे यांचा राजीनामा, हा शरद पवार यांच्या स्क्रिप्टचा एक भाग

छत्रपती संभाजीनगर : ‘‘दिवस उगवला की, पंतप्रधान मोदी, मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांच्यावर खासदार संजय राऊत तोंडसुख घेतात. याच राऊतांनी माजी मुख्यमंत्री उद्धव ठाकरे यांना राजीनामा द्यायला लावून भाजपसोबत जाण्याच्या तयारीत असलेले ज्येष्ठ नेते शरद पवार यांना साथ दिली होती’’, असा आरोप शिवसेनेचे प्रवक्ते आमदार संजय शिरसाट यांनी आज पत्रकार परिषदेत केला. त्यामुळे राऊत हे आता पवार झाले आहेत, असा टोलाही त्यांनी लगावला.

आमदार शिरसाट म्हणाले, ‘‘राज्यात महाविकास आघाडी सरकार पडल्यानंतर उद्धव ठाकरे यांना राजीनामा द्यायला लावणे, हा शरद पवार यांच्या स्क्रिप्टचा एक भाग होता. भावनिक राजकारण करून राजीनामा द्यायला लावून भाजपमध्ये जाण्याचा त्यांचा डाव होता. त्यांना संजय राऊत यांची साथ होती. संजय राऊत हा कुणाचा माणूस,असे विचाराल तर ते शरद पवार यांचे खास आहेत, असे म्हटलं तर चुकीचे ठरणार नाही’’, असा दावाही त्यांनी केला.

मराठा आरक्षण आंदोलनाचे नेते मनोज जरांगे पाटील यांनी येणाऱ्या विधानसभा निवडणुकीत सर्व २८८ मतदारसंघांत निवडणूक लढविण्याचा निर्णय घेतला आहे. याबाबत शिरसाट यांना विचारले असता, ‘‘निवडणूक लढविण्याचा अधिकार घटनेने प्रत्येकाला दिलेला आहे. त्यामुळे त्यांचे स्वागत आहे’’, असेही शिरसाट म्हणाले.