Vijay Shivtare : शिवतारे जाणून घेणार कार्यकर्त्यांची मते ; सासवडमध्ये आज बैठक,अपक्ष उमेदवारीबाबत मांडणार भूमिका

सासवड शहर: बारामती लोकसभा मतदारसंघातून अपक्ष लढायचे की नाही, याचा निर्णय घेण्यासाठी माजी राज्यमंत्री विजय शिवतारे यांनी शनिवारी पदाधिकारी व कार्यकर्त्यांच्या बैठकीचे सासवड (ता. पुरंदर) येथे आयोजन केले आहे. याबाबत त्यांनी सांगितले की, अपक्ष लढण्याचा निर्णय मी एकटा घेऊ शकत नाही.

२५ मार्च रोजी रात्री जवळ-जवळ अडीच तास मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्याशी मुंबईत चर्चा झाली. रात्री दोन वाजेपर्यंत आम्ही बारीक-सारिक विषयांवर चर्चा केली. माझे लोकांच्या बाबतीत काय म्हणणे आहे, ते मी मांडले. मतदारसंघातील लोकांच्या भावना मी त्यांच्यासमोर सांगितल्या. लोकांमधून मी निर्णय घेतला होता. त्यामुळे शनिवारी होणाऱ्या बैठकीत साधारण सकाळी ११ ते दुपारी दीड वाजेपर्यंत आम्ही चर्चा करणार आहोत. सर्वांची मतं मी ऐकून घेणार आहे. त्यानंतर लोकांसह कार्यकर्त्यांचा कल काय आहे, हे पाहून निश्चितपणे निर्णय घेईल. निर्णय घेऊनच मी मुंबईला जाणार आहे. त्यानंतर भूमिका जाहीर करणार आहे.

शिंदे, फडणवीस व पवार काय म्हणाले, हे सर्व कार्यकर्त्यांना सांगणार आहे. त्यांना विश्वासात घेऊन नक्की काय करायचे, हे तिथे ठरवले जाईल. जनतेचे प्रश्न घेऊन आम्ही लढतो. त्याबाबत काय चर्चा झाली, ती लोकांना सांगणार आहे. माघार शब्द वेगळा आहे.

- विजय शिवतारे, माजी राज्यमंत्री