कोल्हापुरात जन्मलेला प्रत्येक सामान्य कार्यकर्ता राजर्षी शाहू महाराजांच्या विचारांचा वारसदारच आहे; काय म्हणाले मंडलिक?

नानीबाई चिखली : ‘अवर्षणग्रस्त असलेल्या कागल तालुक्यात हरितक्रांती आणण्याचे काम दिवंगत खासदार सदाशिवराव मंडलिक यांनी केले. त्यावर कळस चढविण्याचे काम मंत्री हसन मुश्रीफ (Hasan Mushrif) यांनी केले. विकासाची ही गंगा यापुढे अशीच अविरत सुरू ठेवण्यासाठी तालुक्याचा सुपुत्र आणि स्वाभिमान म्हणून मला मोठे मताधिक्य द्या,’ असे आवाहन महायुतीचे उमेदवार खासदार संजय मंडलिक (Sanjay Mandlik) यांनी केले.

नानीबाई चिखली (ता. कागल) जिल्हा परिषद मतदारसंघातील राष्ट्रवादी काँग्रेसच्या मेळाव्यात मंडलिक बोलत होते. ‘संजय मंडलिक यांना पुन्हा खासदार करण्यासाठी ही निवडणूक (Kolhapur Lok Sabha) आता कार्यकर्त्यांनीच हातात घ्यावी,’ असे आवाहन या मेळाव्यात पालकमंत्री हसन मुश्रीफ यांनी केले.

पालकमंत्री मुश्रीफ म्हणाले, ‘संजय मंडलिक यांनी निवडून आणण्यासाठी प्रत्येक मतदारापर्यंत जा, मतदारांना भेटून आपली भूमिका स्पष्ट करा. आमचं जे व्हायचे ते होऊ दे. संजय मंडलिक यांना आपण विधानसभेसाठी कोणतीही अट घालू नका. त्यांना प्रचंड मताधिक्य देऊया. त्यांच्या विजयात आपला सिंहाचा वाटा असेल.’

प्रा. मंडलिक म्हणाले, ‘दिवंगत खासदार सदाशिवराव मंडलिक यांचा वेदगंगा, दूधगंगा, चिकोत्रा या तिन्ही नद्यांवर धरणे बांधण्याचा आग्रह होता. पाटबंधारेमंत्री झाल्यावर त्यांनी कामाला सुरुवात केली. पुढे पालकमंत्री हसन मुश्रीफ यांनी पूर्तता केली. त्यामुळेच पावसाळ्यानंतर कोरड्याठाक होणाऱ्या नद्या आणि कालवे बारमाही वाहत आहेत. कोल्हापूर जिल्ह्यात जन्मलेला प्रत्येक सामान्य कार्यकर्ता हा राजर्षी छत्रपती शाहू महाराजांच्या विचारांचा वारसदारच आहे.’

सरपंच अल्लाबक्ष सय्यद यांनी स्वागत केले. सदाशिव तुकान यांनी प्रास्ताविक केले. जिल्हा बँकेचे संचालक भैया माने, ‘बिद्री’चे माजी संचालक प्रवीणसिंह भोसले, राष्ट्रवादीचे तालुकाध्यक्ष विकास पाटील, दीपाली कुदळे, सुदाम देसाई, भाऊसाहेब पाटील यांनी मनोगत व्यक्त केले. यावेळी मंडलिक कारखान्याचे संचालक ॲड. वीरेंद्र मंडलिक, जिल्हा परिषद सदस्या शिवानी भोसले, शशिकांत खोत, विश्वास कुराडे, शहाजी यादव, भूषण पाटील आदी उपस्थित होते. बशीर नदाफ यांनी आभार मानले.

पिक्चर अभी बाकी है...!

संजय मंडलिक म्हणाले, ‘या मतदारसंघातील कार्यकर्त्यांच्या एवढ्या प्रचंड उपस्थितीमुळे माझ्या मोठ्या मताधिक्याची खात्री मला पटलेली आहे. ‘ये तो सिर्फ झाकी है, पिक्चर अभी बाकी है...’ असे म्हणताच उपस्थितांनी जोरदार टाळ्या वाजवून प्रतिसाद दिला.