Ratnagiri Sindhudurg Lok Sabha : नारायण राणेंना महायुतीची उमेदवारी म्हणजे मला देवच पावला; असं का म्हणाले राऊत?

रत्नागिरी : रत्नागिरी-सिंधुदुर्ग लोकसभा (Ratnagiri-Sindhudurg Lok Sabha) मतदारसंघातून नारायण राणे (Narayan Rane) यांना महायुतीची उमेदवारी म्हणजे मला देवच पावला. याचा अर्थ विनायक राऊत (Vinayak Raut) यांच्यावर देवाची कृपा आहे. मात्र, देवाधर्माची पर्वा न करता मंदिरावर वरवंटा फिरवणाऱ्या राणेंना देव शिक्षा करणारच आणि पराभवाची हॅट्‌ट्रिक होणार, अशी प्रतिक्रिया महाविकास आघाडीचे विनायक राऊत यांनी दिली.

प्रचारानिमित्त रत्नागिरी दौऱ्यावर असताना पत्रकारांशी झालेल्या चर्चेवेळी ते बोलत होते. राऊत म्हणाले, ‘‘राडेबाज कृती कोकण स्वीकारणार नाही. शिव्या घालणाऱ्यांनी अनामत टिकवावी, असे आव्हान आहे. माझ्यावर भ्रष्टाचाराचे आरोप करणारे नीलेश राणे (Nilesh Rane) यांना महत्त्व देत नाही. माझा खासदारकीचा निधी १०० टक्के खर्ची पडला आहे. त्याची माहिती घेऊन आरोप करावे. फुकटचे अकलेचे तारे तोडू नयेत.

माझा एक पैसाही टक्केवारीशी संबंध आहे, असे सिद्ध झाले तर पाहिजे ते करायला तयार आहे. नारायण राणेंनी आरोप करावेत , त्याला उत्तर देण्यास हा बाळासाहेबांचा कडवट शिवसैनिक सक्षम आहे; परंतु नको त्यांनी आरोप करू नयेत.’’

दहा वर्षांमध्ये काय केले म्हणणाऱ्या राणेंनी ३९ वर्षांमध्ये दोन्ही जिल्ह्यांत किती दिवे लावले, ते दाखवावे. नारायण राणे हे लघु व सूक्ष्म मंत्रालय विभागाचे (एमएसईमी) पहिले लाभार्थी आहेत. त्यांच्या कणकवलीतल्या ऑफिसमध्ये एमएसएमईचं कार्यालय आहे. त्याचे ते भाडं दर महिन्याला घेतात.

प्रोसेसिंग युनिट कुठे?

२० प्रोसेसिंग युनिट कुठे केली ते तरी दाखवा. दोन्ही जिल्ह्यात एमएसएमईच्या माध्यमातून १० जणांना उभे केले ते दाखवा. या खात्याकडून सुशिक्षित बेरोजगारांना उद्योगासाठी ७५ लाखांपासून ३ कोटींपर्यंत कर्ज दिले जाते, असे खाते आहे; परंतु त्यांना ते कळलेच नाही, असा टोला राऊत यांनी लगावला

सामंतांच्या आता नाकीनऊ

उद्योगमंत्री उदय सामंत आणि किरण सामंत यांना आता कळून चुकले असेल. उद्धव ठाकरेंनी त्यांच्यासाठी रेड कार्पेट टाकले होते. भाजपमध्ये गेल्यावर त्यांना किती नाकीनऊ आले ते कळले असेल, असे सूचक विधान खासदार विनायक राऊत यांनी केले.