Loksabha 2019: काँग्रेसची दहावी यादी जाहीर; पुण्याचा घोळ काही सुटेना!

नवी दिल्ली- आगामी लोकसभा निवडणुकीसाठी काँग्रेसने उमेदवारांची आज (सोमवार) दहावी यादी जाहीर केली आहे. या यादीतही पुण्याच्या उमेदवाराचा समावेश नाही. पुण्याच्या उमेदवाराचे अद्यापही काँग्रेसकडून जाहीर करण्यात आलेले नाही. काँग्रेसने आज जाहीर केलेल्या 26 उमेदवारांच्या यादीत महाराष्ट्रतील केवळ एका उमेदवाराचा समावेश असून मुंबई काँग्रेसचे नेते संजय निरूपम यांचा समावेश आहे.

संजय निरूपम हे वायव्य मुंबई मतदारसंघातून निवडणुक लढवतील. ही जागा युतीत शिवसेनेला सुटलेली असून शिवसेनेकडून या मतदारसंघात गजानन किर्तीकर यांना उमेदवारी देण्यात आलेली आहे. आता कांग्रेसकडून संजय निरूपम यांना उमेदवारी जाहीर झाल्याने निरूपम आणि गजानन किर्तीकर यांच्यात थेट लढत आपल्याला पहायला मिळणार आहे.
 
दरम्यान, मुंबई काँग्रेस अध्यक्षपदावरून संजय निरूपम यांची उचलबांगडी करण्यात आली असून मिलींद देवरा हे मुंबई काँग्रेसचे आता नवे अध्यक्ष असणार आहेत. दरम्यान, पुण्यात भाजपकडून मंत्री गिरीश बापट यांना उमेदवारी जाहीर झाली असून त्यांनी प्रचाराला सुरवातही केली आहे. तरी, काँग्रेसचा पुण्यातील उमेदवार ठरत नसल्याने राजकीय चर्चांना मात्र उधाण आले आहे.