Loksabha 2019 : पुण्यात उमेदवाराविनाच काँग्रेसने फोडला प्रचाराचा नारळ

लोकसभा 2019
पुणे : पुण्यात अखेर काँग्रेस आघाडीच्या लोकसभा निवडणूकीच्या प्रचाराचा नारळ आज फुटला. कसबा पेठ परिसरात आज काँग्रेस कार्यकर्त्यांनी आतिषबाजी करुन ढोलताशाच्या गजरात नारे लगावले. पुण्यातून काँग्रेस उमेदवाराचे नाव अद्यापही गुलदस्त्यात असले तरी उमेदवाराशिवाय पक्षाचे पदाधिकारी व कार्यकर्त्यांनी पदयात्रा काढत प्रचाराला सुरवात केली आहे.

यावेळी 'चौकीदार चोर है' च्या घोषणांनी सर्व कार्यकर्त्यांनी परिसर दणाणून सोडला. तसेच पक्षाने कोणताही उमेदवार दिल्यास तो बहुमताने विजयी करण्याचा निर्धार पक्ष कार्यकर्त्यांनी केला. या पदयात्रेत हातात झेंडे घेऊन महिलाही सहभागी झाल्या आहेत. काँग्रेसच्या प्रचारासाठी खासदार वंदना चव्हाण, रमेश बागवे, चेतन तुपे, अरविंद शिंदे, प्रवीण गायकवाड, मोहन जोशी सहभागी आघाडीच्या पदाधिकारी उपस्थित होते. 

त्वष्टा कासार मंदिर, पवळे चौक, साततोटी चौक, फडके हौद, आरसीएम गुजराथी हायस्कूल या मार्गाने पदयात्रा जाणार असून नगरसेवक रविंद्र धंगेकर यांच्या कार्यालयाजवळ समारोप होईल. पदयात्रेच्या माध्यमातून जोरदार शक्तीप्रदर्शनासाठी काँग्रेसकडून नियोजन करण्यात आले आहे. राष्ट्रवादी काँग्रेस व इतर मित्रपक्षांचे पदाधिकारी व कार्यकर्ते देखील या पदयात्रेत सहभागी होणार आहेत.