Loksabha 2019 : गौतम गंभीर राजकारणाच्या मैदानात; दिल्लीचा उमेदवार तोच?

नवी दिल्ली : भारताचा माजी सलामीवीर गौतम गंभीरने आज (ता. 22) भारतीय जनता पक्षामध्ये प्रवेश केला. माहिती प्रसारण मंत्री रविशंकर प्रसाद व अर्थमंत्री अरूण जेटली यांच्या उपस्थितीत गंभीरने भाजपत प्रवेश केला.

गंभीरला आगामी लोकसभा निवडणूकीमध्ये दिल्लीतून उमेदवारी मिळण्याची शक्यता आहे. यंदाच्या लोकसभा निवडणूकीतील पहिले मतदान 11 एप्रिलला होणार आहे आणि निकाल 23 मे ला जाहीर केले जाणार आहेत. गेल्या अनेक दिवसांपासून गंभीर भाजपमध्ये प्रवेश करणार असल्याच्या चर्चा होत्या. 

काश्मिरमधील पुलवामा येथे झालेल्या दहशतवादी हल्ल्यानंतर पाकिस्तानसोबत असलेले क्रिकेट संदर्भातील सगळे संबंध तोडून टाकण्याचे मत त्याने व्यक्त केले होते. जून महिन्यात होणाऱ्या विश्वकरंडकात अंतिम सामना जरी पाकिस्तानविरुद्ध असला तरी खेळू नका असे वक्तव्य त्याने केले होते आणि त्यामुळेच तो सध्या खूप चर्चेत आला आहे. तसेच तो सध्या सामाजिक कार्यातही पुढाकार घेताना दिसतो.