Maharashtra Politics: शिंदे सरकार पडणार? "22 आमदार सोडण्याच्या मनस्थितीत तर 9 खासदारही संपर्कात"

शिवसेनेत गेल्या काही दिवसात नाराजीचे सुर दिसून येत आहेत. अशातच काही मंत्री आमदार शिंदे गट सोडण्याच्या तयारीत असल्याच्या चर्चा राजकीय वर्तुळात सुरू आहेत. अशातच बालाजी किणीकर शिवसेना सोडणार असल्याच्या तयारीत आहेत. ते मातोश्रीवर परत घ्या म्हणत असल्याचा दावा काल राष्ट्रवादीचे नेते आणि आमदार जितेंद्र आव्हाड यांनी केला होता. अशातच 22 आमदार शिंदे गटाला सोडण्याच्या मनस्थितीत असून 9 खासदारही संपर्कात असल्याचा गौप्यस्फोट ठाकरे गटाच्या नेत्याने केला आहे.

शिंदे गटाचे २२ आमदार वैतागले असून हे आमदार शिंदे गटातून बाहेर पडण्याच्या मनस्थितीत आहेत. 13 पैकी 9 खासदारही आमच्या संपर्कात आहेत. खासदारही शिंदे गटाला वैतागले आहेत. कामं होत नाहीत, तुच्छतेची वागणूक मिळत आहे. एकनाथ शिंदे यांनी स्वत:चं बुड स्थावर केलं आहे.

इतर कुणालाही किंमत मिळत नाही, अशी तक्रार या आमदार, खासदारांनी केला असल्याचा दावा ठाकरे गटाचे खासदार विनायक राऊत यांनी केला आहे. राऊत यांच्या या दाव्याने राजकीय नेत्यांच्या भुवया उंचावल्या आहेत.

शंभूराजे देसाईंनी पंधरा दिवसापूर्वी उद्धव ठाकरेंना निरोप पाठवला होता. आमची इकडे गळचेपी होत आहे, असं शंभुराज देसाई यांनी उद्धव ठाकरे यांना सांगितल असल्याचा दावा विनायक राऊत यांनी केला आहे.

तानाजी सावंत आणि गजानन कीर्तिकर यांनी प्रतिक्रीया दिली आहे. तानाजी सावंत यांना बजेट मिळत नाही. आगीतून फुफाट्यात पडल्याचं ते म्हणत आहेत. भाजपने आता शिंदे गटाला नामोहरण करण्याचा प्रयत्न सुरू केलाय. त्यामुळेच शिंदे गटाच्या आमदार आणि खासदारांची कोंडी झाल्याचा दावा विनायक राऊत यांनी केला आहे.