Food Infection : शिर्डीत सहलीला गेलेल्या 88 विद्यार्थ्यांना अन्नातून विषबाधा; उलटीचा होऊ लागला त्रास

अहमदनगर : पंढरपुरातील (Pandharpur) घटना ताजी असतानाच, आता शिर्डीतून (Shirdi) एक धक्कादायक बातमी समोर आलीये. अमरावतीहून (Amravati) शिर्डीत आलेल्या विद्यार्थ्यांना जेवणातून विषबाधा झाल्याची माहिती आहे.

काल रात्री जेवणानंतर अचानक उलटी आणि मळमळीचा त्रास सुरू झाल्यानं विद्यार्थ्यांना रुग्णालयात दाखल करण्यात आलं. यात जवळपास 88 जणांना अन्नातून विषबाधा झाल्याचं समोर आलंय.

विद्यार्थ्यांवर शिर्डीतील साईनाथ रुग्णालयात उपचार सुरू असल्याची माहिती आहे. मिळालेल्या माहितीनुसार, अमरावतीतील दर्यापूर तालुक्याच्या (Daryapur Taluka) आदर्श हायस्कूलची शिर्डीला सहल आली होती. इयत्ता चौथी ते सहावीचे एकूण 230 विद्यार्थी सहलीला आले होते.

या विद्यार्थ्यांची शाळेनं नेवासा इथं थांबण्याची व्यवस्था केली होती. सहलीच्या ठिकाणी जेवण केल्यानंतर मुलांची प्रकृती बिघडली. काल रात्री जेवण केल्यानंतर 88 विद्यार्थ्यांना उलटी आणि मळमळचा त्रास होऊ लागला होता. दरम्यान, सर्व विद्यार्थ्यांची प्रकृती स्थिर असल्याची माहिती डाॅ. प्रितम वडगावे यांनी दिली.