''वेश्यागृहातील ग्राहकाला अटक करता येणार नाही!'' उच्च न्यायालयाचा निर्वाळा, नेमकं प्रकरण काय होतं?

मुंबई : वेश्यागृहावर टाकलेल्या छाप्यात नेहरूनगर पोलिसांनी तीन वर्षांपूर्वी अटक केलेल्या एका ग्राहकाला न्यायालयाने मोठा दिलासा दिला आहे. वेश्यागृहातील ग्राहक हा ‘भादंवि’ कलम ३७०च्या कक्षेत मोडत नसल्यामुळे त्याला अटक करता येणार नसल्याचे सांगत न्यायाधीश भारती डांगरे यांनी ग्राहकाची जामिनावर सुटका केली आहे.

नेहरूनगर पोलिसांनी २०२१ मध्ये वेश्यागृहावर छापा टाकला होता. त्यावेळी या ग्राहकाला पोलिसांनी अटक केली होती. त्यानंतर त्याच्याविरुद्ध पोक्सो आणि अनैतिक व्यापार प्रतिबंधक कायद्यांतर्गत गुन्हा दाखल करून अटक केली.

त्यानंतर त्याने जामिनासाठी उच्च न्यायालयात जामीन अर्ज दाखल केला. या अर्जावर न्या. डांगरे यांच्या एकलपीठासमोर सुनावणी घेण्यात आली. त्यावेळी आरोपीतर्फे अॅड. प्रभंजय दवे यांनी युक्तिवाद केला. त्यावेळी सांगण्यात आले की, ‘आरोपीविरुद्ध पोक्सो कायद्याअंतर्गत गुन्हा दाखल केला आहे; मात्र वेश्यागृहातील मुलगी अल्पवयीन असल्याची त्याला कल्पना नव्हती.

विशिष्ट रक्कम देऊन महिलांसोबत लैंगिक सुख उपभोगता येईल, असे प्रलोभन दाखवल्यानंतर तो वेश्यागृहात आला होता. त्यामुळे पोलिसांची कारवाई चुकीची असून अर्जदाराला जामीन देण्यात यावा, अशी मागणी करण्यात आली. त्यानंतर न्यायालयाने त्यांचा युक्तिवाद ग्राह्य मानून वेश्यागृहातील ग्राहक हा भादंवि कलम ३७०च्या कक्षेत मोडत नसल्याचे निरीक्षण नोंदवून जामीन मंजूर केला.