Abhishek Ghosalkar Firing : अभिषेक घोसाळकर हत्येप्रकरणी मृत मॉरिसविरोधात गुन्हा दाखल; दोघांना घेतलं ताब्यात

मुंबईः माजी नगरसेवक अभिषेक घोसाळकर यांची गुरूवारी गोळ्या झाडून हत्या करण्यात आली. ज्याने गोळ्या झाडल्या त्या मॉरिस नावाच्या गुंडानेही स्वतःवर गोळी झाडत आत्महत्या केली. या प्रकरणी पोलिसांनी मॉरिसविरोधात गुन्हा दाखल केला आहे.

abhishek ghosalkar murder case

मुंबईत गुरुवारी रात्री घडलेल्या घटनेने खळबळ उडाली आहे. विशेष म्हणजे फेसबुक लाईव्ह करुन मॉरिसने घोसाळकरांवर गोळ्या झाडल्या. त्यामुळे हा सगळा प्रकार सोशल मीडियात व्हायरल झाला. त्याने ५ गोळ्या झाडून अभिषेक यांची हत्या केली.

दहिसर गोळीबारप्रकरणी आता पोलिसांनी मृत आरोपी मॉरिसविरुद्ध गुन्हा दाखल केला आहे. आयपीसी कलम 302 तसेच शस्त्रास्त्र कायद्याच्या कलमान्वये कलम 37 (1) (अ), आणि 135 नुसार गुन्हा दाखल करण्यात आला. मुंबई पोलिसांच्या हवाल्याने 'एएनआय'ने ही माहिती दिली.

दरम्यान, अभिषेक घोसाळकर हत्येप्रकरणात पोलिसांनी मॉरिस नोरोन्हा उर्फ मॉरिस भाईचा पीए मेहूल पारिख आणि रोहित साहू या दोघांना ताब्यात घेतलं आहे. गोळीबार होण्यापूर्वी मॉरिस आणि अभिषेक घोसाळकर यांच्यात झालेल्या संभाषणामधून मेहूल पारिख याच्या नावाचा उल्लेख झालेला होता.

याप्रकरणी राज्याचे उपमुख्यमंत्री अजित पवार म्हणाले की, ही घटना अतिशय दुर्दैवी आहे. व्हिडीओमध्ये दोघे गप्पा मारत होते. दोघांचं संभाषण स्पष्ट आहे. ते ऐकल्यावर दोघांचे मित्रत्वाचे संबंध असून चांगली ओळख असल्याचं दिसत आहे. याचा कसून तपास झाला पाहिजे. माणुसकीला काळिमा फासणारी ही घटना असल्याचं पवार म्हणाले.