आम्ही जावईहट्ट पुरवत आलोय, अजितदादांची विधानसभा अध्यक्षांपुढे फटकेबाजी

मुंबई - विधानसभा अध्यक्षपदाची निवडणूक पार पडली. यात भाजपचे उमेदवार राहुल नार्वेकर विजयी झाले. महाराष्ट्र विधानसभेत राहुल नार्वेकर हे सर्वात कमी वयाचे विधानसभा अध्यक्ष ठरले आहेत. त्यांच्या विजयानंतर मुख्यमंत्री एकनाथ शिंदे, देवेंद्र फडणवीस यांनी भाषणा केली. तर अजित पवार यांनी आपल्या खास शैलीत राहुल नार्वेकर यांचे अभिनंदन करताना त्यांच्याकडे विरोधकांचा हट्ट पुरविण्याची मागणी केली. (Ajit Pawar's demand to Assembly Speaker Rahul Narvekar)

अजित पवार यांनी आपल्या भाषणात नार्वेकर हे राष्ट्रवादी पक्षात होते अशी आठवण करून देताना मावळ लोकसभा मतदार संघातून 2014 साली आमचे उमेदवारही होते असं म्हटलं. नार्वेकर हे अत्यंत हुषार असून कायद्याचे अभ्यासक आहेत. मात्र त्यांचं चातुर्य मी पाहात आलो आहे.

ज्या पक्षात जातील तिथं पक्ष नेतृत्वाला आपलं करून घेतात. राष्ट्रवादीत असताना त्यांनी मला आपलं केलं. शिवसेनेत गेल्यावर ते आदित्य ठाकरेंचे निकटवर्तीय झाले. तर आता भाजपमध्ये जावून देवेंद्र फडणवीसांना त्यांनी आपलंस केलं. आता एकनाथ शिंदेची वेळ असल्याचं अजित पवार यांनी म्हटलं.

अजित पवार पुढं म्हणाले की, राहुल नार्वेकर विधान परिषद अध्यक्ष रामराजे नाईक निंबाळकर यांचे जावई आहेत. अर्थात आमचे जावई आहेत. आम्ही अनेकदा जावईहट्ट पुरवत आलो आहोत. यापुढे जावयांनी आमचा हट्ट पुरवावा अशी मागणी अजित पवार यांनी आपल्या अभिनंदन भाषणात केली.