Amravati Murder Case: क्रुरतेचा कळस! मानेची जखम ८.2 सेमी खोल; मणक्यापर्यंत घाव

नुपूर शर्मा यांच्या पोस्ट चे समर्थन केल्यामुळे अमरावतीमधील व्यावसायिक उमेश कोल्हे यांची हत्या करण्यात आली होती.हत्या प्रकरणी पोस्टमॉर्टम रिपोर्ट जारी करण्यात आला आहे. मानेच्या डाव्या बाजूला हल्ला झाला होता. ही जखम 8.2 सेमी इतकी खोल आहे.(Amravati Murder Case)

पोस्टमार्टम रिपोर्टमध्ये 17 व्या मुद्द्यात, मानेच्या डाव्या बाजूला चाकूपासून मणक्यापर्यंत खोल जखम असल्याचे म्हटले आहे. डाव्या स्टर्नोक्लाइडोमास्टॉइड स्नायू, गुळाच्या शिरा आणि कॅरोटीड धमनी तसेच अन्ननलिकेपर्यंत खोल जखमा आहेत. त्याचवेळी डाव्या पायाला चिरलेली जखमही पाहायला मिळाली.

काय आहे प्रकरण?

नुपूर शर्मा यांचे समर्थन केलं म्हणून अमरावतीच्या मेडिकल व्यावासायिक असलेल्या उमेश कोल्हे यांची हत्या करण्यात आली होती. या हत्येचा मास्टरमाईंड असलेल्या इरफान खानला बेड्या ठोकण्यात आल्या आहेत. इरफान खान हा रहबर नावाची एक एनजीओ चालवतो. त्यानेच आरोपींना उमेश कोल्हे यांची हत्या करण्याचा आदेश दिला होता हे समोर आलं आहे.

त्यानंतर आरोपींनी 21 जून रोजी उमेश कोल्हे यांची हत्या केली. प्रथमदर्शनी ही हत्त्या लूटपाट करण्याच्या उद्देशाने झाली असल्याचा संशय व्यक्त करण्यात आला. मात्र आज तब्बल 12 दिवसांच्या तापसानंतर अमरावती शहर पोलिसांनी ही हत्या नुपूर शर्मा यांच्या पोस्ट व्हायरल केल्यामुळेच झाली असल्याचे स्पष्ट केले. आजच केंद्रीय गृहमंत्रालयाने कोल्हे यांच्या हत्येचा तपास एनआयएकडे सोपविण्यात आल्याचं ट्विट केलं आणि त्यानंतर अमरावती पोलिसांनी ही माहिती दिली.