मुख्यमंत्र्यांच्या पत्नीने मोदींना दिल्या शुभेच्छा; पण झाल्या ट्रोल!

मुंबई : पंतप्रधान नरेंद्र मोदी यांचा आज वाढदिवस असल्याने त्यांच्यावर विविध स्तरावरून शुभेच्छांचा वर्षाव होत आहे. मुख्यमंत्री देवेंद्र फडणवीस यांच्या पत्नी अमृता फडणवीस यांनीही त्यांना शुभेच्छा दिल्या. मात्र, शुभेच्छा देत असताना त्यांनी मोदींचा उल्लेख पंतप्रधान म्हणून करण्याऐवजी राष्ट्रपिता (Father of our Country) असा केला आहे.

अमृता फडणवीस यांनी याबाबतचे ट्विट केले. या ट्विटमध्ये त्या म्हणाल्या, की आपल्या देशाचे पिता नरेंद्र मोदीजी, जे समाजाच्या कल्याणासाठी अथक परिश्रम घेण्याची प्रेरणा देतात त्यांना वाढदिवसाच्या खूप शुभेच्छा. तसेच त्यांनी या ट्विटसोबत 'ओ रे मनवा तू तो बावरा है', हे स्वत:च्या आवाजात गायलेले गाणंही ट्विट केले. ट्विट केलेल्या व्हिडिओमध्ये मुख्यमंत्री देवेंद्र फडणवीस टाळ्या वाजवताना दिसत आहेत.

सेल्फीमुळे वादात

मुंबई ते गोवा या जलमार्गावरील ‘आंग्रीया’ क्रूझच्या डेकवर सुरक्षारक्षकांना डावलून अमृता फडणवीस यांनी सेल्फी काढला होता. त्यांच्या या सेल्फीनंतर त्यांच्यावर टीका झाली होती. त्यानंतर आता त्यांच्या या ट्विटमुळे त्यांच्यावर सोशल मीडियावर टीका केली जात आहे.

भाजपकडून आमदार नितेश राणे कणकवलीतून लढणार !