Ashish Shelar : भाजप वाघनख आणत असल्याने पेंग्विन कुटुंबाच्या पोटात दुखतं; शेलारांचा ठाकरेंना टोला

मुंबई - ऐतिहासिक पार्श्वभूमी असलेले छत्रपती शिवाजी महाराज यांची वाघनखं महाराष्ट्रात आणली जाणार आहेत. त्यासाठी सांस्कृतीक मंत्री इंग्लंडला रवाना झाले आहेत. मात्र यावरून राजकारण तापलं आहे. ठाकरे गटाचे नेते आदित्य ठाकरे यांनी यावर प्रश्न उपस्थित केल्यानंतर भाजपकडून त्यांना चोख प्रत्युत्तर देण्यात आलं आहे.

भाजपचे मुंबई अध्यक्ष, आशिष शेलार म्हणाले की, हा सर्व प्रकार हास्यास्पद सुरू आहे. ही वाघनख भाजप आणत आहेत. त्यामुळे पेंग्विन कुटुंबाच्या पोटात दुखत आहेत. वाघनखं येणार म्हणून नकली वाघ स्टेटमेंट करायला लागल्याची टीका शेलार यांनी केली.

'उबाठा'ची लोक वारंवार छत्रपती आणि त्यांच्या परिवाराबाबत प्रश्न उपस्थित करत आहेत. छत्रपतींच्या शौर्यावर प्रश्न हे कोणाच्या मतांसाठी उपस्थित करत आहेत. पबमधील विषयाचा थयथयाट रस्त्यावर करायचा नसतो. हे मला आदित्य ठाकरे यांना सांगायचे, असंही शेलार यांनी म्हटलं.

शिवाजी पार्क येथील दसरा मेळाव्याबाबत शेलार म्हणाले की, संजय राऊत लिहिताना चिलीम आणि बोलताना गांजा घेऊन बोलतात. कुणीही बुद्धिमान व्यक्ती त्यावर उत्तर देणार नाही. दसरा मेळाव्यासाठी शिवाजी पार्क कुणाला द्यायचा हा निर्णय महापालिका घेईल, असंही ते म्हणाले.

आदित्य ठाकरे यांनी वाघनखांबाबत शंका उपस्थित करताना ते खरे आहेत की, खोटे याबाबत विचारणा केली होती. त्यावरून आदित्य ठाकरे यांच्यावर भाजपकडून कडाडून टीका करण्यात येत आहे.