सदाभाऊ खोत यांना उधारी मागणाऱ्याला अटक; उधारीसाठी अडवला होता ताफा

मुंबई - रयत क्रांती संघटनेचे नेते सदाभाऊ खोत विरोधकांवर आपल्या खास शैलीत टीका करण्यासाठी ओळखले जातात. मात्र सदाभाऊ यांच्यावर काही महिन्यांपूर्वी हॉटेल चालकाच्या उधारीमुळे नामुष्की ओढावली होती. मात्र आता त्या हॉटेल चालकाला पोलिसांनी अटक केली आहे. अशोक शिंगारे असं त्या हॉटेल चालकाचे नाव आहे. (Sadabhau Khot news in Marathi)

हॉटेल चालक अशोक शिंगारे यांनी सदाभाऊ यांचा ताफा अडवून माझी उधारी द्या, अशी मागणी केली होती. त्यामुळे मोठा वाद झाला होता. शिंगारे हा राष्ट्रवादी काँग्रेसचा कार्यकर्ता असल्याचा आरोप करण्यात आला होता. तर शिंगारे याने आपण कोणत्याही पक्षाचा कार्यकर्ता नसल्याचं म्हटलं होतं.

दरम्यान शिंगारे याला अवैध वाळू उपसा प्रकरणी पंढरपूर ग्रामीण पोलिसांनी अटक केली आहे. पोलिसांनी सांगितलं की, एक लाख ५६ हजार रुपयांचा मुद्देमाल जप्त करण्यात आला आहे. भादवि कलम ३७९ आणि कलम २१ अन्वये अशोक शिंगारे यांच्यावर गुन्हे दाखल करण्यात आले आहे.