Bacchu Kadu : सध्या धोका देणाऱ्यांचं राज्य आहे; बच्चू कडूंचा नेमका निशाणा कोणावर?

Maharashtra Politics : एकनाथ शिंदे (Eknath Shinde) आणि देवेंद्र फडणवीस (Devendra Fadnavis) सरकारचा मंत्रीमंडळ विस्तार काल पार पडला. यामध्ये 18 आमदारांनी मंत्रिपदाची शपथ घेतली. मंत्रीमंडळात स्थान न मिळाल्यामुळं काही अपक्षांनी नाराजी व्यक्त केलीय. यावर प्रहार संघटनेचे प्रमुख बच्चू कडू (Bacchu Kadu) यांनी देखील प्रतिक्रिया दिलीय. मुख्यमंत्री एकनाथ शिंदे यांनी मंत्रीपद देतो म्हणून मला शब्द दिला होता, अशी प्रतिक्रिया बच्चू कडू यांनी दिलीय.

आज पुन्हा माध्यमांशी संवाद साधताना त्यांनी नव्या सरकारवर निशाणा साधलाय. बच्चू कडू म्हणाले, मंत्रिमंडळ विस्तार सप्टेंबरमध्ये होईल असं मला सांगण्यात आलंय. मुख्यमंत्र्यांनी मंत्रीपदाबाबत दिलेला शब्द पाळणार असल्याचंही सांगितलंय. हा मंत्रिमंडळ विस्तार 40 दिवसांनी झाला तर ठिक, अन्यथा पुढच्या अडीच वर्षात होईल, असं सूचक वक्तव्य त्यांनी केलंय. सध्या धोका देणाऱ्यांचं राज्य आहे, असंही ते म्हणाले.

मंत्रीमंडळ विस्तारानंतर प्रसारमाध्यमांशी बोलताना बच्चू कडू म्हणाले होते की, 'नाराज आहे असा विषय नाही, प्रत्येकाला वाटतं मी मंत्री बनले पाहिजे. मला मंत्रिपदासाठी थांबवले म्हणजे कायमचं थांबवलं नाही, काही दिवसासाठी थांबवलं आहे... एकत्र राहायचं म्हणजे समजून घ्यावे लागणार. काही अडचणी वरिष्ठांना असतील तर आपण समजदारी घेतली पाहिजे. मला शब्द दिला होता, ते करतो म्हणले होते. मंत्रीपद देतो म्हणून हा शब्द मला दिला होता. हा शब्द जरी पहिल्या मंत्रिमंडळ विस्तारात पाळला गेला नाही तरी मला विश्वास आहे दुसऱ्या वेळेस जेव्हा मंत्रिमंडळाचा विस्तार होईल तेव्हा मंत्रीपद मिळेल, असा विश्वास बच्चू कडू यांनी व्यक्त केलाय.