Bawankule Video : हाच 'तो' बावनकुळेंचा डिलिट झालेला व्हिडिओ; शिंदेसाठी धोक्याची घंटा!

मुंबई : भाजपचे प्रदेशाध्यक्ष चंद्रशेखर बावनकुळे यांचा आगामी विधानसभा निवडणुकीच्या जागावाटपा बाबतचा व्हिडिओ सोशल मीडियावर व्हायरल झाला आहे. यामध्ये शिंदे गटाला फक्त ५० जागा देणार असल्याचं ते बोलत आहेत आणि नंतर लगेच सारवासारव करताना दिसत आहेत. काही वेळानंतर हा व्हिडिओ सोशल मीडियावरून डिलीट करण्यात आला होता.

व्हायरल व्हिडिओमध्ये काय बोलले बावनकुळे?

"२०२४ ची निवडणूक १०० टक्के आपलीच आहे. आपले १६० ते १७० सीट निवडूण येतील पण आपण २४० जागेवर लढण्याचा प्रयत्न करणार आहोत. त्यापैकी शिंदेचे ५० आहेत. त्यापेक्षा जास्त त्यांच्याकडे कुणी नाहीये..." असं बावनकुळे व्हिडिओमध्ये बोलताना दिसत आहे.

जागावाटपाबद्दल बावनकुळे नंतर म्हणाले...

"आगामी विधानसभा निवडणुकीत भाजपा २४० जागा लढवण्याचा विचार करत असल्याचं वक्तव्य मी पक्षाच्या पदाधिकाऱ्यांना निवडणुकीच्या तयारीच्या दृष्टीने मार्गदर्शन करण्यासाठी केलं होतं. निवडणुकीच्या वेळी जागावाटपाचा विचार होईल. शिंदे गटाबरोबर असलेल्या आमदारांच्या जागांपेक्षा ज्या आणखी जागा शिंदे गटाकडे जातील, त्यांना भाजपाने केलेल्या तयारीचा उपयोग होईल." असं वक्तव्य नंतर बावनकुळे यांनी केलं.

दरम्यान, हा व्हिडिओ व्हायरल झाल्यानंतर जागावाटपाचा असा काही फॉर्म्युला ठरलेला नसल्याचं बावनकुळे त्यांनी सांगितलं आहे. त्यामुळे आता त्यांच्या शिंदे गटाला दिल्या जाणाऱ्या जागेबाबतची चर्चा राजकीय वर्तुळात सुरू झाली आहे. भाजप जर २४० जागांवर लढणार असेल तर शिंदे गटाला फक्त ४८ जागा मिळणार का? अशा चर्चा आता सुरू झाल्या आहेत.