ठरलं! राष्ट्रपती पदाच्या निवडणुकीनंतर शिंदे सरकारचा मंत्रीमंडळ विस्तार

राष्ट्रपती पदाच्या निवडणुकीनंतर शिंदे सरकारचा मंत्रीमंडळ विस्तार होणार आहे. दरम्यान, पहिल्या टप्प्यात 10 मंत्री घेणार शपथ घेणार असल्याची माहिती मिळत आहे. शिंदे गटाचे पाच तर आणि भाजपचे पाच मंत्री घेणार शपथ घेणार असल्याची माहिती 'साम' या वृत्तवाहिनीने दिली आहे. अधिवेशनाच्या पार्श्वभूमीवर आधी 10 मंत्र्यांना शपथ देणार असून अधिवेशन संपले की दुसऱ्या टप्प्यातील मंत्रीमंडळाचा विस्तार होणार असल्याची माहिती मिळत आहे. त्यामुळे आता पहिल्या टप्प्यात कोणाला संधी मिळणार हे पहावे लागणार आहे.

राज्यातील सत्ताबदलनंतर उद्धव ठाकरे यांनी मुख्यमंत्री पदाचा राजीनामा दिला आणि महाविकास आघाडी सरकार कोसळलं. त्यानंतर महाराष्ट्रात एकनाथ शिंदे-फडणवीस सरकार कारभार पाहत असून अद्याप या मंत्रीमंडळाचा विस्तार झालेला नाही. दरम्यान, या मंत्रिमंडळाच्या शपथविधी संदर्भात बातमी समोर येत आहे. हा शपथविधी येत्या १९ जुलै रोजी होणार असल्याची माहिती मिळत आहे.

या सरकारमध्ये मंत्रिपद मिळवण्यासाठी अनेक आमदारांचे प्रयत्न सुरू असून, शिंदे आणि फडणवीस यांच्यात राज्यात तसेच दिल्लीतही बैठका पार पडल्या आहेत. दिल्लीत अलिकडेच पंतप्रधान नरेंद्र मोदी, गृहमंत्री अमित शहा यांच्या भेटीदरम्यानही मंत्रीमंडळ विस्तारावर सविस्तर चर्चा झाल्याचे कळते. या बैठकीत मंत्र्यांच्या नावावर शिक्कामोर्तब झाले असून, आता शपथविधी पार पडणार असल्याचे समजते.

दरम्यान, १८ जुलै रोजी राष्ट्रपतिपदाची निवडणूक आहे. तत्पूर्वी 'एनडीए'च्या राष्ट्रपतिपदाच्या उमेदवार द्रौपदी मुर्मू यांचा १४ जुलै रोजी मुंबई भेटीचा कार्यक्रम निश्चित झाला आहे. त्यामुळे १८ जुलैला राष्ट्रपतिपदासाठीची निवडणूक झाली की त्याच्या दुसऱ्या दिवशी महाराष्ट्रातील मंत्रिमंडळाला वेग येणार आहे. त्यामुळे सध्या राजकीय वर्तुळात चर्चांना उधाण आलं आहे.