मुख्यमंत्री त्रस्त आहेत, असं अजिबात वाटत नाही - छगन भुजबळ

मुंबई: "वैचारिक मतभिन्नता असते. राजकारणात सगळे मैत्री जपतात. विरोधी पक्ष दुष्मन नसतात मित्र असतात. कदाचित दानवे यांना शिवसेनेत यायचं असं असेल तर..." असे राष्ट्रवादी काँग्रेसचे (ncp) नेते आणि मंत्री छगन भुजबळ (chhagan bhujbal) यांनी मुख्यमंत्र्यांच्या विधानावर म्हटलं आहे.

मराठवाडा मुक्तिसंग्राम दिनाच्या निमित्ताने आयोजित एका कार्यक्रमात बोलताना मुख्यमंत्री उद्धव ठाकरे (cm uddhav thackeray) यांनी 'आजी, माजी आणि एकत्र आलो तर भावी सहकारी' असं विधान केलं. त्या विधानावरुन राजकीय वर्तुळात मोठ्या प्रमाणावर तर्क-वितर्क लढवले जात आहेत.

"फडणवीसांच्या वक्तव्याशी मी सहमत नाही. काँग्रेस-राष्ट्रवादीचा काहीही त्रास मुख्यमंत्र्यांना नाही. मागच्या पाच वर्षात शिवसेनेला भाजपने कशी वागणूक दिली हे सर्वांना माहीत आहे" असे भुजबळ म्हणाले. "केंद्रात मंत्री असताना इतर पक्षांना दिलेली मंत्रिपद आणि शिवसेनेची केलेली अवहेलना. सरकार स्थापन करताना घोळ, जवळ घेतल्यावर काय दिलं. हे सगळ्यांना माहीत आहे" असे भुजबळ म्हणाले. "मुख्यमंत्री त्रस्त आहेत, असं मला अजिबात वाटत नाही" असा दावा भुजबळ यांनी केला. "महाविकास आघाडीपासून धोका असेल. पण आघडीला धोका नाही" असं भुजबळ यांनी म्हटलं आहे.