AIMIM ऑफरबाबत शिवसेनेच्या भूमिकेकडं भाजपचं लक्ष : देवेंद्र फडणवीस

मुंबई : भाजपला (BJP) हरवण्यासाठी सगळेजण प्रयत्न करत आहेत. मात्र, महाराष्ट्रातील जनता भाजलाच कौल देणार आहे. स्वाभिमानीचे नेते राजू शेट्टी (Raju Shetti) हे आमच्यासोबत होते. परंतु, काही कारणास्तव ते महाविकास आघाडीत सामील झालेत. तसेच भाजपसोबत कोण असणार कोण नाही, याचा आम्हाला कोणताही फरक पडत नाहीय. त्याचबरोबर एमआयएमची महाविकास आघाडीला (Mahavikas Aghadi) हातमिळवण्याची ऑफर आहे. मात्र, शिवसेना कोणती भूमिका घेणार हे महत्वाचं ठरणार आहे, असं स्पष्ट मत विरोधी पक्षनेते देवेंद्र फडणवीस (Devendra Fadnavis) यांनी व्यक्त केले.

महाविकास आघाडीशी हातमिळवणी करण्याची एमआयएमची तयारी : इम्तियाज जलील

एकीकडं भाजप महाविकास आघाडीला खिंडार पाडण्याची भाषा करतं आहे, तर दुसरीकडं ओवैसींच्या एमआयएमनं महाविकास आघाडीशी हातमिळवणी करण्याची तयारी दाखवलीय. महाविकास आघाडीशी हातमिळवणी करण्याची एमआयएमची तयारी असल्याचं समोर आलंय. शरद पवारांपर्यंत निरोप पोहोचवा, अशी विनंती एमआयएमचे खासदार इम्तियाज जलील (Imtiaz Jaleel) यांनी आरोग्यमंत्री राजेश टोपेंना केलीय. एमआयएमच्या या ऑफरनंतर आता शिवसेनेच्या भूमिकेकडं लक्ष लागून आहे. राष्ट्रवादी आणि काँग्रेसला एमआयएमकडून आघाडीची ऑफर देण्यात आलीय. भाजपला हरवायचं असल्यास सर्वांनी एकत्र यायला हवं, असं खासदार इम्तियाज जलील यांनी वक्तव्य केलंय.