'बहुत याराना लगता है!'; काँग्रेसने शेअर केला फडणवीसांचा व्हिडिओ

राज्यात गेल्या काही दिवसांपासून महाविकास आघाडी (MVA Government) आणि भाजपमध्ये (BJP) जोरदार आरोप प्रत्यारोप सुरु आहेत. संजय राऊत (Sanjay Raut) यांनी घेतललेल्या पत्रकार परिषदेनंतर आणखीच वातावरण ढवळून निघालं आहे. केंद्रीय यंत्रणांच्या गैरवापराबद्दल संजय राऊत यांनी काही गंभीर आरोप केले आहेत. त्यावरून आता महाविकास आघाडी आणि भाजपमधील आरोप प्रत्यारोपांची मालिका अत्यंत टोकाच्या थराला गेल्याची पाहायला मिळतेय. त्यानंतर आता काँग्रेस नेते सचिन सावंत यांनी आज एक नवं ट्विट केलं आहे. या ट्विटच्या माध्यमातून त्यांनी देवेंद्र फडणवीस यांच्यावर निशाणा साधण्याचा प्रयत्न केला आहे.

बहुत याराना लगता है! म्हणत काँग्रेस नेते सचिन सावंत यांनी हा व्हिडिओ शेअर केला आहे. यामध्ये देवेंद्र फडणवीस एका कार्यक्रमात बसलेले दिसत आहेत.त्यांच्या आजूबाजूला काही लोकंही बसलेले आहेत. काही क्षणानंतर सुट-बुट आणि कोट घातलेली एक व्यक्ती फडणवीसांना येऊन भेटते. तेव्हा देवेंद्र फडणवीस उठून उभे राहतात आणि त्यांच्या हातात हात मिळवतात. ही व्यक्ती कोण आहे हे अद्याप समजू शकलेलं नसलं तरी, सचिन सावंत यांना काय सांगायचं आहे ते लवकरच स्पष्ट करतील अशी शक्यता आहे.

"लोकशाहीवरील भाजपाचे गंडांतर पाहूनच लोकशाहीच्या संरक्षणासाठी मविआ सरकारची स्थापना झाली. हे सरकार पाडण्यासाठी मोदी सरकार तपास यंत्रणांचा नाझी SS सैन्याप्रमाणे वापर करत आहेत. सरकारच्या बदनामीसाठी मविआ नेत्यांचा भयंकर छळ चालू आहे. याविरोधात देशहितासाठी लढावेच लागेल. ते ही एकजुटीने..." असं म्हणत सचिन सावंत यांनी संजय राऊत यांच्या पत्रकार परिषदेला समर्थन दिलं होतं.