भुजबळांच्या बेनामी प्रॉपर्टीची पाहणी केल्यानं माझ्यावर गुन्हा; सोमय्यांचे ट्विट

मुंबई - भाजप नेते किरीट सोमय्या यांना पोलिसांनी नोटिस पाठवली आहे. याबाबतची माहिती किरीट सोमय्या यांनी स्वत: ट्विटरवरून दिली आहे. छगन भुजबळ यांच्या बेनामी प्रॉपर्टीची, ९ मजली बंगल्याची पाहणी केल्यानं आपल्यावर गुन्हा दाखल करण्यात आल्याचं ट्विट सोमय्यांनी केलं आहे.

सोमय्यांनी ट्विटमध्ये म्हटलं की, ठाकरे सरकार/पोलीसची माझा विरुद्ध आणखी एक नोटीस. छगन भुजबळ यांच्या सांताक्रुझ येथील 'बेनामी प्रॉपर्टी' ९ मजली बंगलोची पाहणी केल्याबद्दल माझ्याविरुद्ध गुन्हा दाखल.

भुजबळांची प्रॉपर्टी पाहणी केल्यानं आपल्यावर गुन्हा दाखल करण्यात आल्याचा दावा किरीट सोमय्यांनी केला आहे. मात्र पोलिसांनी पाठवलेल्या नोटिसमध्ये कलम १८८ अंतर्गत कोरोना नियमांचे उल्लंघन केल्याचं म्हटलं आहे. तसंच याचं स्पष्टीकरण देण्यासाठी पोलिसांनी सोमय्या यांना हजर राहण्यासही सांगण्यात आलं आहे. जर हजर न राहिल्यास आपणास काहीही सांगावयाचे नाही असे समजून पुढील कारवाई करण्यात येईल असे नोटीसमध्ये म्हटले आहे.