Eknath Shinde: मुख्यमंत्र्यांच्या सभेला पैसे देऊन जमवणार गर्दी? ऑडिओ क्लिप व्हायरल

पैठण : मंत्री संदीपान भुमरे यांचा मतदारसंघ असलेल्या पैठणमध्ये आज मुख्यमंत्री एकनाथ शिंदे यांची जाहीर सभा होणार आहे. या सभेत संदिपान भुमरे शक्तिप्रदर्शन करणार असून आज होणाऱ्या मुख्यमंत्र्यांच्या सभेला पैसे देऊन गर्दी जमवण्यात येत असल्याचा आरोप शिवसेनेकडून करण्यात आला आहे. दरम्यान यासंदर्भात एक ऑडिओ क्लिप सध्या व्हायरल होत आहे.

(Paithan CM Eknath Shinde Sabha Audio Clip)

आज मुख्यमंत्र्यांच्या होणाऱ्या सभेसाठी महिलांना प्रत्येकी ३०० रूपये देण्याची मागणी करताना या क्लिपमध्ये ऐकायला येत आहे. तर समोरचा व्यक्ती एका महिलेला २५० रूपये देण्यासंदर्भात बोलत असल्याचं समजत आहे. सध्या ही ऑडिओ क्लिप व्हायरल झाली असून 'सकाळ माध्यम' या ऑडिओ क्लिपची पुष्टी करत नाही. त्याचबरोबर शिवसेनेचे नेते चंद्रकांत खैरे यांनीही पैसे देऊन गर्दी केली जाणार असल्याचा आरोप केला आहे.

तात्पुरत्या मुख्यमंत्र्यांसाठी भुमरे खोके खाली करत आहेत असं वक्तव्य करत माजी खासदार चंद्रकांत खैरे यांनी भुमरेंवर निशाणा साधला आहे. "तात्पुरते मुख्यमंत्री पैठणला येत आहेत आणि त्यांच्या सभेसाठी कुठून कुठून माणसं आणले जात आहेत. तालुक्याच्या बाहेरून प्रत्येकाला पैसे देऊन लोकं आणले जात आहेत. मला अनेक लोकांचे फोन आले आणि सांगितलं की प्रत्येकाला २५०-३०० रूपये दिले जात आहेत आणि गाडीत बसवलं जात आहे." असा आरोप चंद्रकांत खैरे यांनी केला आहे.

दरम्यान, मुख्यमंत्र्यांच्या सभेला गालबोट लावण्यासाठी ही ऑडिओ क्लिप व्हायरल केली जात असल्याचा आरोप मंत्री संदीपान भुमरे यांच्या कार्यकर्त्यांनी केला आहे. तर यासंदर्भात सायबर पोलीसांकडे तक्रार करणार असल्याचं विलास भुमरे यांनी सांगितलं आहे.