Electricity Bill : वीज बिल भण्यासाठी ऑनलाईन लिंक देवून फसवणाऱ्या दोघांना अटक; मुंबई पोलिसांची कारवाई

मुंबईः तुमचं वीजबिल थकलंय, त्यामुळे तुमची वीज जोडणी तोडण्यात येईल; अशा धमक्या मोबाईलवरुन येत असतात. मग वीजबिल भरण्यासाठी एक लिंक येते. त्यावर क्लिक केलं की पैसे कट होतात. त्यानंतर पश्चातापाशिवाय पर्याय उरत नाही. असंच ठगवणाऱ्या दोन ठगांना मुंबई पोलिसांनी अटक केली आहे.

मुंबईतील शिवडी पोलिसांनी झारखंडमधील रांची येथून दोन जणांना वीजबिल भरण्यासाठी बनावट ऑनलाइन लिंक पाठवून फसवणूक केल्याप्रकरणी अटक केली आहे. वीरेंद्र अशोक लोहरा आणि उमेश परमेश्वर साव अशी अटक केलेल्या दोन आरोपींची नावे आहेत.

या दोघांनी किती लोकांकडून पैसे उकळले आणि त्यांच्यावर आणखी गुन्हे दाखल आहेत का? याबाबत शिवडी पोलिस तपास करीत आहेत. महाराष्ट्रात अनेक लोकांची वीजबिल भरण्याच्या नावाखाली फसवणूक होत असते. अशा फेक लिंकवर क्लिक करु नये, याबाबत वारंवार सजग केलं जातं. परंतु असे सायबर गुन्ह्याचे प्रकार वरचेवर वाढतच आहेत.