गडचिरोलीत पूरस्थिती कायम; कोल्हापुरात संथ गतीने घट

सकाळ वृत्तसेवा
गुरुवार, 12 सप्टेंबर 2019

राज्यात पावसाचा जोर ओसरला
पुणे - ऑगस्ट महिन्याच्या अखेरपासून जवळपास दोन आठवडे सुरू असलेल्या पावसाचा जोर ओसरला आहे. मध्य प्रदेश आणि गुजरातमध्ये पावसाने जोर धरल्याने या राज्यांना लागून असलेल्या उत्तर महाराष्ट्र आणि विदर्भातील जिल्ह्यात हलक्या ते मध्यम स्वरूपाचा पाऊस पडत आहे. आज (ता. १२) उत्तर कोकण, जळगावसह उत्तर महाराष्ट्रात तुरळक ठिकाणी मध्यम ते जोरदार पावसाचा अंदाज हवामान विभागाने वर्तविला आहे.

नागपूर/कोल्हापूर - मध्य प्रदेशात पावसाचा जोर कायम असल्यामुळे पूर्व विदर्भातील गडचिरोली, भंडारा जिल्ह्यांत पूर परिस्थिती तिसऱ्या दिवशीदेखील कायम होती. गोंदिया जिल्ह्यात मंगळवारी पूर ओसरला. मात्र, १२०० हेक्‍टरवरील पिकांचे नुकसान झाल्याचा अंदाज वर्तविला जात आहे. 

कोल्हापूर जिल्ह्यात गेल्या दोन दिवसांपासून पाऊस थांबल्याने नद्यांचे पाणी संथ गतीने ओसरण्यास सुरवात झाली आहे. पाणी ओसरण्याची गती संथ असली तरी, पुढील कालावधीत पाणी जलद ओसरेल, असा अंदाज जलसंपदा विभागाने व्यक्त केला.

भंडारा जिल्ह्यात नद्यांच्या पाण्याची पातळी कमी झाल्याने जिल्ह्यात सर्वदूर रस्ते वाहतुकीसाठी खुले करण्यात आले आहेत. परंतु मध्य प्रदेशात पावसाची संततधार सुरू असल्याने जिल्हाधिकारी डॉ. नरेश गिते यांनी सर्वच विभागांना सतर्क राहण्याचे आदेश दिले आहे. जिल्ह्यात पूर परिस्थितीच्या पार्श्‍वभूमीवर हाय अलर्ट जारी करण्यात आला असून बोट व इतर आधुनिक साहित्य सज्ज ठेवण्याचे निर्देश देण्यात आले आहेत. गडचिरोली जिल्ह्याच्या भामरागड तालुक्‍याचा संपर्क तिसऱ्या दिवशीदेखील जिल्हा मुख्यालयापासून तुटलेला होता. जिल्ह्यातील नद्या तिसऱ्या दिवशीदेखील ओव्हरफ्लो वाहत होत्या. त्यामुळे गेल्या तीन दिवसांपासून सर्वच रस्ते वाहतुकीसाठी बंद आहेत.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Gandhiroli Bhandara Flood Madhyapradesh Rain