सावित्रीच्या लेकींच्या हाती एसटीचे स्टेअरिंग

यवतमाळ : आज महिला सर्वच क्षेत्रांत पुढे येत असताना राज्याच्या इतिहासात प्रथमच परिवहन महामंडळात यवतमाळ जिल्ह्यातील अनुसूचित जमाती प्रवर्गातील मुलींना वाहनचालक म्हणून नियुक्ती देण्यात येणार आहे. यासाठी निवड झालेल्या मुलींच्या अभ्यासपूर्व प्रशिक्षणाला प्रारंभ झाला. 

राज्यातही महिलांना एसटी चालक म्हणून संधी द्यावी, अशी विनंती महसूल राज्यमंत्री संजय राठोड यांनी परिवहन मंत्री दिवाकर रावते यांच्याकडे केली होती. त्यांनी ती मान्य केली आणि शिवसेनाप्रमुख बाळासाहेब ठाकरे यांच्या जन्मदिवसाचे औचित्य साधून राज्य परिवहन महामंडळात विशेष बाब म्हणून अनुसूचित जमाती प्रवर्गातील महिला चालकांची भरती करण्याची घोषणा केली.

आदिवासी बहुल यवतमाळ जिल्ह्यातील किमान शंभर मुलींची भरती करण्याचे उद्दिष्ट होते. मात्र, हे आव्हान स्वीकारण्यासाठी केवळ 25 मुली पुढे आल्या. त्यांच्या निवास, भोजनाची व्यवस्था करून त्यांना स्थानिक पातळीवर प्रशिक्षण देण्यात आले. त्यांचे हलके आणि अवजड वाहनचालक परवाने काढण्यात आले. 

मुंबईत 21 जानेवारी 2018 रोजी मान्यवरांच्या उपस्थितीत झालेल्या एका समारंभात या मुलींना महामंडळात वाहनचालक म्हणून नियुक्ती देण्याची घोषणा रावते यांनी केली. त्यानंतर उद्‌भवलेल्या विविध तांत्रिक अडचणी पार करीत एक वर्षानंतर यातील 21 मुलींचे चालकपूर्व प्रशिक्षण सुरू झाले आहे.

प्रशिक्षणासाठी निवड झालेल्यांमध्ये सुवर्णा मेश्राम, मनीषा गाडेकर, हर्षा लडके, ज्योत्स्ना ठाकरे, रंजना शेळके, सुशीला वडेकर, पूजा नैताम, गायत्री होलगरे, अंजुता भोसले, सुवर्णा कुंभरे, पूजा टेकाम, शिल्पा तडाम, सुवर्णा नागमोते, शिल्पा पेंदोर, सीमा गवळी, अनसूया मडावी, महानंदा ठाकरे, शीतल पवार, नम्रता आगलावे, सपना कुरसंगे, राधा दाभेकर यांचा समावेश आहे. मंत्री संजय राठोड यांच्या हस्ते या प्रशिक्षणार्थींचे या वेळी प्रशिक्षण निवड पत्र व पुष्पगुच्छ देऊन स्वागत करण्यात आले.