'राम मंदिराला विरोध करणाऱ्यांकडून अहिल्यादेवींच्या स्मारकाचे लोकार्पण नाहीच'

पुण्यश्‍लोक अहिल्यादेवी होळकर (AhilyaDevi Holkar) स्मारकाचे लोकार्पण सोहळ्यावरून निर्माण झालेल्या वादावरुन काल सांगलीत काही ठिकाणी तणावाचे वातावरण निर्माण झाले होते. दरम्यान, या पार्श्वभूमीवर भाजपाचे (BJP) आमदार गोपीचंद पडळकर (Gopichand Padalkar) यांनी गनिमी काव्याने स्मारक परिसरात घुसण्याचा प्रयत्न केला. परंतु तो अयशस्वी ठरला. त्यामुळे त्यांनी 'ड्रोन' कॅमेऱ्याद्वारे स्मारकावर पुष्पवृष्टी करून लोकार्पण केले. यावेळी त्यांनी सत्ताधाऱ्यांनी कितीही सत्तेचा गैरवापर केला तरी आम्ही नेहमीच त्यांच्या नाकावर टिच्चुन काम करणार असल्याची बोचरी टीका केली आहे.

यासंदर्भात त्यांनी एक ट्विटरला एक व्हिडिओ पोस्ट केला आहे. यात त्यांनी महाविकास आघाडी सरकारवर निशाणा साधला आहे. राम मंदिर निर्माण कार्याला विरोध करणाऱ्यांच्या हातून हिंदू संस्कृतीचा जिर्णोद्धार करणाऱ्या पुण्यश्लोक अहिल्यादेवी (Ahilyadevi Holakar) मॉं साहेब यांच्या पवित्र स्मारकाला हात कधीही लागू देणार नाही, असा इशारा त्यांनी दिला आहे.

काय म्हणालेत आमदार पडळकर

सर्वसामान्य मेंढपाळच्या हस्ते डिजिटल युगामध्ये ड्रोनच्या साहय्याने गुलाबाची फुलं अहिल्यादेवीच्या स्मारकावर पुष्पाअर्पण करुन हा लोकार्पण सोहळा थाटामाटात पार पडला. जेव्हा लोकांची भावना असते, लोक जेव्हा एखाद्या विषयाच्या पाठी ठामपणे असतात तेव्हा पोलिसांनी किंवा कुणीही काहीही केलं तरी फरक पडत नाही. ज्यांचा हेतु स्वच्छ आणि स्पष्ट असतो तेव्हा यश मिळत राहत. लोकांची भावना होती की मेंढपाळाच्या हस्ते लोकार्पण व्हावं आणि ते झालं आहे. त्यामुळं सत्ताधाऱ्यांनी कितीही सत्तेचा गैरवापर केला तरी आम्ही नेहमीच त्यांच्या नाकावर टिच्चुन काम करणार असल्याचेही त्यांनी यावेळी स्पष्ट केलं आहे.