''फक्त एका गोष्टीमुळे जयंत पाटील आमच्यासोबत आले नाहीत, नसता त्यांनी शपथ घेतली असती'', मुश्रीफांचा गौप्यस्फोट

मुंबईः राष्ट्रवादी काँग्रेसमध्ये फूट पडली तेव्हा जयंत पाटील हेदेखील आमच्यासोबत येणार होते, असा गौप्यस्फोट राज्याचे वैद्यकीय शिक्षण मंत्री हसन मुश्रीफ यांनी केला आहे. फक्त एका गोष्टीमुळे ते आमच्यासोबत आले नाहीत, असं ते म्हणाले.

अजित पवार यांनी ८ आमदारांना सोबत घेऊन २ जुलै रोजी मंत्रिपदाची शपथ घेतली होती. आता त्यांच्यासोबत ४५ आमदार असल्याचा दावा केला जातोय. राष्ट्रवादी काँग्रेसमधील वाद निवडणूक आयोगामध्ये आणि सुप्रीम कोर्टात सुरु आहे. आमचाच पक्ष खरा असल्याचा दावा दोन्ही गटांकडून होतेय.

त्यातच आता अजित पवार गटाचे नेते तथा राज्याचे वैद्यकीय शिक्षणमंत्री हसन मुश्रीफ यांनी एक खुलासा करत शरद पवार गटाचे प्रदेशाध्यक्ष जयंत पाटील यांच्यावर टीक केलीय. ''जयंत पाटील हे एका गोष्टीमुळे आमच्यासोबत ते आलेले नाहीत, अन्यथा त्यांनी आमच्यासोबतच शपथ घेतली असती. ती गोष्ट नेमकी काय आहे ते मी वेळ आल्यावर स्पष्ट करेन.'' असं मुश्रीफ म्हणाले.

पंतप्रधान नरेंद्र मोदी यांनी शरद पवारांवर केलेल्या टिकेवर हसन मुश्रीफ यांनी मौन बाळगलं. मराठा समाजाच्या नागरिकांनी आज सकाळी माझी गाडी अडवली पण मी त्यांचं समाधानकारक उत्तर दिलेलं आहे, न्यायालयात टिकणारं आरक्षण मराठा समाजाला मिळावं, यासाठी सरकारचा प्रयत्न असल्याचं मुश्रीफांनी स्पष्ट केलं.