मान्सून येता येता राहिला! राज्यात पावसाऐवजी उष्णतेची लाट

उन्हाने काहिली झालेल्या महाराष्ट्राला आता मान्सूनची चाहूल लागली आहे. आता येईल, मग येईल, असं करत चातकाप्रमाणे राज्य मान्सूनची वाट पाहतंय. पण मान्सून सारखा चकवाच देतोय. पण आता तर अगदी उंबरठ्यावर आलेला मान्सून खोळंबल्याचं चित्र आहे. राज्यात पावसाऐवजी उष्णतेची लाट आलीये. (Monsoon In Maharashtra)

विदर्भात उच्चांकी तापमानाची नोंद झाली आहे. त्यामुळे विदर्भात दोन दिवस उष्णतेच्या लाटेचा (Heat Wave in Vidarbha) इशारा हवामान विभागाकडून देण्यात आला आहे. नैऋत्य मोसमी वाऱ्याच्या अरबी समुद्रातल्या प्रवेशाला पोषक वातावरण नसल्यानं महाराष्ट्रातला मान्सून लांबणीवर पडला आहे. गेल्या तीन दिवसांपासून मान्सून कर्नाटकातल्या कारवारमध्ये खोळंबलाय.

बंगालच्या उपसागराच्या परिसरात मात्र पावसाने चांगलाच जोर धरला आहे. थेट हिमालयापर्यंत पाऊस पोहोचला आहे. मात्र उत्तरेकडून येणाऱ्या कोरड्या आणि उष्ण वाऱ्यांमुळे उत्तर भारतात विदर्भासह काही ठिकाणी उष्णतेच्या लाट आहे. ही लाट दोन दिवस कायम राहणार असल्याचा अंदाज हवामान विभागाने वर्तवला आहे.