वानखेडेंना अटक करण्यापूर्वी द्यावी लागणार नोटीस, न्यायालयाचा दिलासा

मुंबई : एनसीबीचे झोनल डायरेक्टर समीर वानखेडे (sameer wankhede) यांच्याविरोधात काही तक्रारी दाखल झाल्यामुळे मुंबई पोलिसांकडून (mumbai police) त्यांची चौकशी करण्यासाठी एक विशेष तपास पथक स्थापन करण्यात आले आहे. मुंबई पोलिस त्यांना अटक करतील अशी भीती त्यांना आहे. त्याविरोधात समीर वानखेडे यांनी मुंबई उच्च न्यायालयात (high court) धाव घेतली आहे. न्यायालयाने त्यांना तूर्तास दिलासा दिला आहे.

"माझ्यावरील आरोपांविषयी एनसीबीच्या तपास पथकाकडून आधीच चौकशी सुरू झाली आहे. मग मुंबई पोलिसांच्या स्वतंत्र विशेष तपास पथकाची आवश्यकता काय? मुंबई पोलिस मला लक्ष्य करेल. त्यामुळे सीबीआय किंवा एनआयएकडे तपास द्यावा", अशी विनंती समीर वानखेडे यांनी याचिकेतून केली आहे. त्यानंतर सरकारी वकिलांनी युक्तीवाद करताना ''समीर वानखडे यांना अटक करण्यापूर्वी तीन दिवस आधी नोटीस देऊ'' असे सांगितले. हे सरकारी वकिलाने सांगितल्याने न्यायालयाने याचिका निकालात काढली. तूर्तास राज्य सरकारने कुठलीही कठोर कारवाई करू नये आणि अटक करायची असेल तर तीन दिवसांपूर्वी कळवावे, असं न्यायालयाने म्हटले आहे. त्यामुळे समीर वानखेडे यांना राज्य सरकारच्या कारवाई तूर्तास का होईना दिलासा मिळाला आहे.

गेल्या काही दिवसांपासून मंत्री नवाब मलिक समीर वानखेडे यांच्यावर आरोप करत आहेत. त्यांनी बोगस प्रमाणपत्र दाखवून नोकरी मिळविल्याचा आरोप त्यांच्यावर करण्यात आला आहे. त्यांची काही कागदपत्रं देखील मलिक यांनी समोर आणली होती. त्यानंतर वानखेडेंच्या विरोधात मुंबई पोलिसांत ४ तक्रारी दाखल झाल्या होत्या. त्यानंतर मुंबई पोलिसांनी चौकशीसाठी एक समिती तयार केली होती. मात्र, एनसीबीकडून चौकशी सुरू असताना आता मुंबई पोलिसांकडून चौकशी का? असा प्रश्न उपस्थित करत वानखेडेंनी न्यायालयात धाव घेतली होती.