‘मी...जाहीर करतो की, माझी वैयक्तिक माहिती व फोटो’ हा फेसबुकवरील व्हायरल मेसेज बनावट! अफवांवर विश्वास ठेवल्यास होऊ शकते फसवणूक; सायबर पोलिसांचे स्पष्टीकरण;

तात्या लांडगे

सोलापूर : सध्या प्रत्येकाच्या फेसबुकवर स्वत:ची वैयक्तिक माहिती व फोटो कोणालाही वापरण्याची परवानगी देत नाही, अशा स्वरूपाचा मेसेज पाहायला मिळत आहे. तसा मेसेज पोस्ट करा, नाहीतर तुमची परवानगी आहे असे समजले जाईल, असे म्हणून त्याची मुदत आजच आहे, असेही सांगितले जात आहे. मात्र, तो मेसेज खोटा असून, कोणीतरी पोस्ट केलेला मेसेज अज्ञानातून तसाच पुढे फॉरवर्ड झाल्याचे सायबर पोलिसांनी स्पष्ट केले आहे.

फेसबुक, व्हॉट्‌सॲप हॅक करणे, अनोळखी क्रमांकावर कॉल किंवा मेसेज आणि त्यात लिंक पाठवून वैयक्तिक स्वरूपाची माहिती भरायला सांगितले जाते. अनेक सुशिक्षित तरुण, तरुणी, व्यावसायिक सायबर गुन्हेगारांच्या आमिषाला सहजपणे बळी पडतात, त्यामागे असते कमी दिवसांत जादा पैसे कमाविण्याची हाव आणि अज्ञान, असे सायबर पोलिस सांगतात. मध्यंतरी एका बॅंकेचा मेसेज व्हायरल करून ते अधिकाधिक लोकांना पाठविल्यास काहीतरी महागडे गिफ्ट मिळेल, असे सांगितले गेले.

सध्या सोशल मीडिया वापरणारे अनेकजण कोणत्याही मेसेजची खात्री न करता तो आहे तसाच पुढे फॉरवर्ड करतात. त्यामुळे देखील अनेकांची फसवणूक होते. त्यामुळे अशा व्हायरल मेसेजची प्रत्येकानी खात्री करावी, जेणेकरून फसवणूक होणार नाही आणि अज्ञान दूर होईल, असे आवाहन सायबर पोलिसांनी केले आहे.

काय आहे ‘तो’ व्हायरल मेसेज

मी...असे स्पष्ट करतो की, मी माझी वैयक्तिक माहिती आणि फोटोच्या वापरासाठी फेसबुक किंवा मेटाला कोणतीही परवानगी देत नाही. फेसबुकचे नवीन नियम उद्यापासून लागू होतील, जे तुमचे फोटो वापरण्याची परवानगी देतात. ही वेळ मर्यादा आज संपत आहे. कृपया, हा संदेश कॉपी करा व तुमच्या प्रोफाईलवर एक नवीन पोस्ट तयार करून पोस्ट करा. जे असे करत नाहीत त्यांनी परवानगी दिल्याचे मानले जाईल. गोपनीयतेचे उल्लंघन केल्यास कायदेशीर परिणाम होऊ शकतात. मी माझी वैयक्तिक माहिती व फोटोंच्या वापरासाठी फेसबुक व मेटा यांना कोणतीही परवानगी देत नाही. असो तो व्हायरल मेसेज आहे.

खात्री करूनच मेसेज खरा की खोटा ठरवावे

सध्या फेसबुकवर अनेकांनी एक मेसेज पोस्ट केला आहे. पण त्यात काहीही तथ्य नाही. कोणीही अफवांवर विश्वास ठेवू नये, असा काहीही मेसेज पुढे फॉरवर्ड करण्यापूर्वी सायबर पोलिसांशी संपर्क साधावा. आर्थिक फसवणुकीसंदर्भात लोकांना १९३० या टोल फ्री क्रमांकावरून मदत मिळू शकते.

- श्रीशैल गजा, वरिष्ठ पोलिस निरीक्षक, सायबर पोलिस ठाणे, सोलापूर शहर