Jayant Patil: राष्ट्रवादीच्या मेळाव्यातच रंगली जयंत पाटलांच्या राजीनाम्याची चर्चा, वाचा काय आहे नेमकं प्रकरण

शरद पवार यांच्या राष्ट्रवादी काँग्रेस पक्षाच्या 25 व्या वर्धापन दिनानिमित्त आज नगरमध्ये विशेष कार्यक्रमाचे आयोजन करण्यात आले होते. या कार्यक्रमात जयंत पाटील यांनी त्यांच्याकडे असलेल्या प्रदेशाध्यक्षपदाबाबत मोठो खुलासा केला.

जयंत पाटील हे गेल्या पाच-सहा वर्षांपासून राष्ट्रवादी काँग्रेसचे प्रदेशाध्यक्ष आहेत. राष्ट्रवादी फुटण्यापूर्वीही अनेक नेत्यांना जयंत पाटील प्रदेशाध्यक्ष पदावर नको होते. इतकेच नव्हे तर अजित पवार यांनीही याबाबत नाराजी व्यक्त केली होती.

दरम्यान, शरद पवार यांच्या राष्ट्रवादीतही प्रदेशाध्यक्षपदी जयंत पाटील कोणाला नको आहेत, का अशी चर्चा त्यांनी आज केलेल्या विधानामुळे पुन्हा सुरू झाली आहे.

कार्यकर्त्यांना मार्गदर्शन करताना जयंत पाटील म्हणाले, "माझी तुम्हाला विनंती आहे, मी पक्षाचा अध्यक्ष असून, माझे महिने अनेकांनी मोजून झाले आहेत. पण आता इथून पुढे माझे चार महिने मोजू नका, मी सगळे व्यवस्थित करतो. आणि ट्विटरवर जाहीरपणे बोलायचे जरा बंद करा. जर जयंत पाटलांची काही तक्रार असेल तर ती पवार साहेबांकडे करा. ते जो काही निर्णय असेल तो अंतिम असेल. पण जाहीर बोलू नका. हा पक्ष एकाची संपत्ती नसून, महाराष्ट्रातील लाखो लोकांंची संपत्ती आहे, असे म्हणत पक्षाबाद्दल जाहीरपणे बोलणाऱ्या पदाधिकाऱ्यांना जयंत पाटील यांनी इशारा दिला."

या कार्यक्रमात पुढे बोलताना जयंत पाटील म्हणाले, नुकत्याच झालेल्या लोकसभा निवडणुकीमध्ये शरद पवारांना बारामतीतच अडकवून ठेवायचे असा विरोधकांचा डाव होता. सुप्रिया सुळे यांचा बारामतीमध्ये पराभव करण्यासाठी त्यांनी शक्य असलेली प्रत्येक गोष्ट केली. पण निवडणुकीत राज्यात फिरणार नाहीत, ते पवार कसले. निकालानंतर या निवडणुकीत राज्यात शरद पवारांची लाट होती हे दिसले. आणि त्यामुळेच 10 पैकी 8 जागा निवडून आल्या आहेत.