संतोष बांगर यांना शह देण्यासाठी सेनेची खेळी; माजी आमदार बांधणार शिवबंधन

हिंगोली : हिंगोली जिल्ह्यातील कळमनुरी येथील आमदार संतोष बांगर गेल्या काही दिवसांपासून आपल्या वादग्रस्त आणि रोखठोक वक्तव्यामुळे चर्चेत आले आहेत. अगोदर रडून शिवसेनेशी गद्दारी केलेल्यांना विरोध करायचा आणि काही दिवसांत शिंदे गटात सामील होण्याचा पराक्रम करायचा अशी टीका त्यांच्यावर झाली होती. त्यानंतर कळमनुरीचे माजी आमदार संतोष टार्फे हे आज शिवबंधन बांधणार असून बांगर यांना टक्कर देण्यासाठी शिवसेनेकडून टार्फे यांना मैदानात उतरवणार का अशा चर्चा सुरू झाल्या आहेत.

(Former MLA of Kalmanuri Santosh Tarphe Joins BJP Today)

आज शिवसेना पक्षप्रमुख उद्धव ठाकरे यांच्या उपस्थितीत ते शिवबंधन बांधणार असून त्यांच्यासोबत शेतकरी नेते अजित मगर हेही शिवबंधन बांधणार आहेत. हे दोन नेते शिवसेनेत घेऊन संतोष बांगर यांना शह देण्याचा शिवसेनेचा डाव असल्याच्या चर्चा आहेत. दरम्यान संतोष बांगर हे सध्या शिंदे गटात आहेत.

एकनाथ शिंदे यांनी शिवसेनेशी बंडखोरी केल्यानंतर संतोष बांगर यांनी रडत रडत गद्दारी केलेल्या आमदारांना परत येण्याचे अवाहन केले होते. त्यानंतरच्या राजकीय घडामोडीनंतर राज्यात सत्तांतर झाले आणि नव्या सरकारला बहुमत सिद्ध करण्याची वेळ आली त्यावेळी संतोष बांगर शिंदे गटात सामील झाले होते. त्यानंतर त्यांच्यावर वेगवेगल्या स्तरातून टीका करण्यात आली होती.

दरम्यान, राज्यातील सत्तांतरानंतर खिळखिळी झालेल्या शिवसेनेला उभारी देण्यासाठी उद्धव ठाकरे आणि आदित्य ठाकरे यांच्याकडून मेळावे, सभा आणि दौरे आयोजित करण्यात येत आहेत. शिवसंवाद यात्रा आणि महाप्रबोधन यात्रेचं आयोजन शिवसेनेकडून करण्यात आलं असून हिंगोलीतील कळमनुरी येथील माजी आमदार संतोष टार्फे आणि शेतकरी नेते अजित मगर हे आज ठाकरेंच्या उपस्थितीत शिवबंधन बांधणार आहेत.