चंद्रकांत पाटील हिमालयात जाणार? जितेंद्र आव्हाड म्हणाले, परत..

राज्यात आरोप प्रत्यारोपाचे राजकारण पेटलेले असताना कोल्हापूर उत्तर विधानसभा पोटनिवडणुकीत काँग्रेसच्या जयश्री जाधव यांनी दणदणीत विजय मिळवला आहे. अनेक दिवसांपासून चर्चेचा विषय झालेल्या या निवडणूकीत चंद्रकांत पाटील यांची प्रतिष्ठा पणाला लागली होती. या निवडणूकत जाधव यांनी भाजपच्या सत्यजीत कदम यांना धूळ चारली. या निकालानंतर राष्ट्रवादीचे नेते जितेंद्र आव्हाड यांनी भाजप आणि चंद्रकांत पाटील यांच्यावर निशाणा साधत खोचक टिका केली आहे.

आव्हाड यांनी चंद्रकांत पाटील यांच्या हारलो तर हिमालयात जाईन या विधानाचा समाचार घेतला आहे, त्यांनी चंद्रकांत पाटील यांची एक मीम ट्विटरवर पोस्ट केली आहे पोटनिवडणुकीच्या निकालानंतर शिवसेना, काँग्रेसकडून देखील चंद्रकांत पाटील यांना त्याच वक्तव्यावरून डिवचलं आहे. जितेंद्र आव्हाड यांनी या निवडणूकीत मिळालेल्या विजयाबाबत ट्विट करत “फुले, शाहू, आंबेडकर विचारांचा विजय… कोल्हापूरची जागा जिंकली… शाहू महाराज की जय”, असं म्हटलं आहे सोबत त्यांनी एक फोटो देखील पोस्ट केला आहे.

तर आव्हाडांनी पोस्ट केलेल्या या फोटो मीममध्ये चंद्रकांत पाटील मांडी घालून, त्यांचे हात घुडघ्यावर ठेवत ध्यान मुद्रेत डोळे मिटून बसल्याचं दिसत आहे. तो फोटो एडीट करून त्यांच्या माहे हिमालयाचा फोटो लावण्यात आला आहे. त्यावर 'मी पोहोचलो रे हिमालयात’ असं वाक्य लिहिलं आहे. याखाली दुसरं ट्विट करत “नको, परत या”, असा टोमणाही त्यांनी मारला आहे.

दरम्यान चंद्रकांत पाटील यांनी त्यांच्या 'हिमालयात जाईन' या विधानावर स्पष्टिकरण देताना त्यांनी म्हटलंय की, आमचे नाना कदम लढले, तर तुमच्या तोंडाला फेस आला. मग, मी लढलो तर काय होईल? मी लढलो आणि हारलो तर हिमालयात जाईल, असं मी म्हटलं होतं, असंही त्यांनी शेवटी नमूद केलं.