Rohit Pawar: 'पहिल्याच दिवशी कॅसिनोवर कायदा..', रोहित पवार संतापले, 'अनुभवी’ नेते म्हणत बावनकुळेंना चिमटा

आजपासून राज्याचं हिवाळी आधिवेशन सुरू होत आहे. वेगवेगळ्या मुद्यांवरून सत्ताधारी आणि विरोधक यांच्यात जुंपण्याची शक्यता आहे. आधिवेशन सुरू होण्याआधीच राष्ट्रवादीचे (शरद पवार) आमदार रोहित पवार यांनी सत्ताधाऱ्यांवर टीका करत सोशल मिडीयावर एक पोस्ट शेअर केली आहे. गेल्या काही दिवसांमध्ये राज्यात पेपरफुटीची प्रकरणे समोर आली होती, त्यावर भाष्य करत सरकारने अधिवेशनाच्या पहिल्याच दिवशी आणलेल्या विधेयकावर हल्लाबोल केला आहे.

रोहित पवारांनी काय लिहलं आहे पोस्टमध्ये?

'राज्यात पेपरफुटीने त्रस्त झालेल्या युवांची याबाबत कठोर कायदा करण्याची मागणी आहे. त्यानुसार अधिवेशनाच्या पहिल्याच दिवशी याबाबत विधेयक आणलं जाईल, अशी अपेक्षा होती, मात्र ती फोल ठरली. परंतु या सरकारने कॅसिनोच्या ‘महत्त्वाच्या’ विषयावर मात्र पहिल्याच दिवशी विधेयक आणलं. हा कायदा करण्यापूर्वी ज्येष्ठ ‘अनुभवी’ नेते चंद्रशेखर बावनकुळे साहेब यांच्या अध्यक्षतेखाली समिती स्थापन करुन त्यांच्याकडे हे विधेयक पाठवण्यात यावं, ही विनंती, अशी पोस्ट राष्ट्रवादीचे आमदार रोहित पवार यांनी केली आहे.

दरम्यान गेल्या काही दिवसांपुर्वी संजय राऊत यांनी कॅसिनोमधील बावनकुळेंचा एक फोटो शेअर करत त्यांच्यावर गंभीर आरोप केले होते. महाराष्ट्रात दुष्काळाची भीषण परिस्थिती असताना तसेच सामाजिक वातावरण बिघडलेले असताना परदेश दौऱ्यावर असलेल्या बावनकुळे यांनी एका रात्रीत कॅसिनोमध्ये साडे तीन कोटी रुपये उडवले, असा गंभीर आरोप राऊत यांनी केला होता.

बावनकुळे यांचा एक फोटो ट्विट करून महाराष्ट्र पेटलेला असताना मकाऊ येथे ते कॅसिनोत जुगार खेळत आहेत, असा दावा राऊत यांनी केला. मात्र राऊतांनी केलेल्या आरोपांचं बावनकुळेंनी स्पष्टपणे खंडन केलं होतं. त्यामुळे बावनकुळे चांगलेच चर्चेत आले होते.

अशातच सरकारने कॅसिनोच्या विषयावर पहिल्याच दिवशी विधेयक आणलं. त्याचबरोबर चंद्रशेखर बावनकुळे यांच्या अध्यक्षतेखाली समिती स्थापन करुन त्यांच्याकडे हे विधेयक पाठवण्यात येणार आहे, त्यावरून रोहित पवारांनी बावनकुळेंना लक्ष केलं आहे.