Nitin Gadkari : पटोलेंच्या ऑफरवर गडकरींचं स्पष्टीकरण; म्हणाले,''मी...''

नितीन गडकरींनी काँग्रेसमध्ये प्रवेश केल्यास आम्ही त्यांना साथ देऊ, असं विधान अलीकडेच काँग्रेस पक्षाचे प्रदेशाध्यक्ष नाना पटोले यांनी केले होते. त्यानंतर अनेक चर्चांना उधाण आले होते. त्यानंतर आता स्वतः गडकरींनी या सर्व चर्चांवर स्पष्टीकरण देत पूर्णविराम दिला आहे.

नितीन गडकरी यांचं भाजपात खच्चीकरण केलं जात असेल, तर त्यांनी काँग्रेस पक्षात प्रवेश करावा, अशा ऑफर त्यांना दिल्या जात होत्या. त्यात पटोलेंनी गडकरींना थेट काँग्रेसमध्ये प्रवेश करण्याची ऑफर दिली होती. मात्र, मी भारतीय जनता पार्टीचा कार्यकर्ता असून राष्ट्रीय स्वयंसेवक संघटनेचा स्वयंसेवक आहे. मी आयुष्यभर माझ्या विचारांप्रमाणे काम करेन, याबाबत माझ्या मनात स्पष्टता असल्याचे स्पष्टीकरण गडकरींनी दिले आहे. त्यामुळे गडकरी भाजपमध्ये नाराज असल्याच्या चर्चांना पूर्णविराम मिळाला आहे.

काय म्हणाले गडकरी?

“मी भारतीय जनता पार्टीचा कार्यकर्ता आहे. मी राष्ट्रीय स्वयंसेवक संघाचा स्वयंसेवक आहे. मी माझ्या विचारांसाठी राजकारणात आलो. त्यामुळे माझ्या विचारधारेशी प्रतारणा करण्याचा प्रश्नच उद्भवत नाही. आता मला कुणी आमंत्रण द्यावं किंवा कुणी काय बोलावं? हा त्यांचा प्रश्न आहे. पण जोपर्यंत मी आहे, तोपर्यंत माझी संघटना, माझा पक्ष आणि माझ्या विचारधारेशी माझी कटिबद्धता कायम राहिल असेही गडकरींनी स्पष्ट केले आहे आहे. मी माझ्या सिद्धांताप्रमाणे आणि विचाराप्रमाणे आयुष्यभर काम करणार असून, याबाबत माझ्या मनात स्पष्टता असल्याचेही गडकरींनी स्पष्ट केले आहे.