Lok Sabha Election: लोकसभेसाठी महायुतीचा जागावाटपाचा फॉर्म्युला ठरला; शिंदे गटाला 12 तर अजित पवार गटाला किती जागा मिळणार?

Lok Sabha Election Seat: आगामी लोकसभा निवडणुकीच्या पार्श्वभूमीवर सर्वच राजकीय पक्षांनी जोरदार तयारी सुरू केली आहे. अशातच राज्यात महाविकास आघाडी विरुद्ध महायुती अशी थेट होणार आहे. महायुतीला पराभूत करण्यासाठी महाविकास आघाडीने प्रयत्न सुरू केले असतानाच दुसरीकडे महायुतीने जागावाटपाचा फॉर्म्युला ठरल्याची माहिती समोर आली आहे.

दरम्यान, जागावाटपाचा फॉर्म्युल्याबाबत अद्याप कोणत्याही नेत्यांनी अधिकृतपणे माहिती दिलेली नाही. सूत्रांच्या माहितीनुसार जो फॉर्म्युला समोर आला. त्यानुसारच महायुतीच्या जागावाटपचं सूत्र असेल. अपेक्षेप्रमाणे भाजपला जास्त जागा मिळणार आहेत.

भाजप महाराष्ट्रातील ३२ जागांवर लोकसभेची निवडणूक लढवणार, असल्याची माहिती आहे. तर मुख्यमंत्री एकनाथ शिंदे यांच्या गटाला फक्त १२ तर अजित पवार गटाला लोकसभेच्या ४ जागा मिळण्याची शक्यता आहे.

भाजपने (BJP) या आधी लोकसभा २०१९ निवडणुकीत लोकसभेच्या २६ जागा लढवल्या होत्या. तर शिवसेनेने २२ जागांवर निवडणूक लढवली होती.

मुख्यमंत्री एकनाथ शिंदे यांच्या गटाला फक्त १२ जागा मिळणार असल्याची चर्चा आहे. सध्या शिवसेनेच्या विद्यमान १८ खासदारांपैकी १३ खासदार एकनाथ शिंदेंसोबत आहेत. अशातच शिंदे गटाला लोकसभेच्या फक्त १२ जागाच मिळण्याची शक्यता आहे. त्यामुळे आता कुणाचं तिकीट कापलं जाणार? हे पाहणं महत्वाचं ठरणार आहे.

दुसरीकडे अजित पवार गटाला लोकसभेच्या ४ जागा मिळण्याची शक्यता आहे. अजित पवार गटाकडे सध्या ३ खासदार आहेत. तरीही आगामी लोकसभा निवडणुकीत त्यांच्या वाटेला ४ जागा येणार असल्याने शिंदे गट नाराज होण्याची शक्यता आहे.