Sharad Pawar : महाराष्ट्राला लवकरच अजित पवार रिटर्न्स भाग-२ बघायला मिळणार; काँग्रेस नेत्याचं सूचक विधान

मुंबई - राष्ट्रवादी काँग्रेसमध्ये सुरू असलेल्या गोंधळावर दररोज नवनवीन घडामोडी समोर येत आहे. सुप्रिया सुळे यांनी गुरुवारी अजित पवार आमच्या परक्षातील ज्येष्ठ नेते असल्याचं म्हटलं होतं. त्यातच आता शरद पवार यांनी देखील अजित पवार आमचेच नेते असल्याचं म्हटलं. यावर आता अजित पवार रिटर्न्स भाग २ लवकरच महाराष्ट्राला पाहायला मिळेल, अशी प्रतिक्रिया काँग्रेसकडून देण्यात आली आहे.

काँग्रेस प्रवक्ते अतुल लोंढे म्हणाले की, शरद पवार यांच्या वक्तव्यावरुन असं लक्षात येत किंवा असा अंदाज लावू शकतो की, महाराष्ट्राला आणि देशाला अजित पवार रिटर्न्स भाग- २ लवकरच बघायला मिळणार आहे. राष्ट्रवादीचे अध्यक्ष शरद पवार यांनी अतिशय स्पष्ट शब्दात सांगितले आहे की, काहीही झालं तरी मी भाजपसोबत जाणार नाही. मी इंडिया सोबत राहणार आहे.

उपमुख्यमंत्री अजित पवार यांच्यासोबत गेलेले मंत्री पुन्हा पुन्हा येतात आणि शरद पवार यांच्या पाया पडतात. याचा अर्थ जी घाण राजकीय क्षेत्रात भाजपने महाराष्ट्रासह देशात केलेली आहे, त्याचं उत्तर अजित पवार रिटर्न्स भाग-२ मधून मिळण्याची शक्यता आहे. त्यामुळे शरद पवार यांनी असं वक्तव्य केलेलं असाव, असंही अतुल लोंढे म्हणाले.