Maratha Reservation : कुणबीच्या 20 हजार नोंदी शिंदे समितीला सापडण्याची शक्यता; 15 ते 20 लाख लोकांना होणार फायदा

मुंबई : मराठवाड्यातील शंभर-दीडशे वर्षांपूर्वीच्या मराठा कुणबी (Maratha Kunbi) नोंद असलेल्या २० हजारांपेक्षा अधिक कुटुंबाच्या नोंदी शिंदे समितीला सापडण्याची शक्यता असून त्याचा फायदा १५ ते २० लाख लोकांना होणार आहे.

कुटुंबाचा विस्तार होत असल्याने ८ ते १० पेक्षा अधिक पिढ्यांच्या झालेल्या विस्तारामुळे अधिक कुटुंबांना याचा लाभ होणार आहे. मराठवाड्यातील मराठा समाजाला (Maratha Reservation) कुणबी जात प्रमाणपत्र (Kunbi Caste Certificate) देण्यासाठी स्थापन करण्यात आलेल्या माजी न्या. संदीप शिंदे समितीचा प्रथम अहवाल आज (ता.३१) मंत्रिमंडळाच्या बैठकीत स्वीकारला जाणार आहे.

त्यानुसार ११ हजार ५३० कुणबी जातीच्या नोंदी सापडल्या आहेत. मात्र, त्यामध्ये सतत वाढ होत असून या नोंदी २० हजारपर्यंत असण्याची शक्यता आहे. मात्र, त्यांचे प्रमाणीकरण व्हायचे आहे. या नोंदींचा फायदा १५ ते २० लाख लोकांना होणार आहे.

शिंदे समितीने खूप कमी कालावधीत १ कोटी ७३ लाख ७० हजार ६५९ नोंदी तपासल्या आहेत. त्यामध्ये कुणबी जातीच्या नोंदीचे प्रमाण ११ हजार ५३९ म्हणजेच ०.०६६ इतकेच अल्प असले आहे. मात्र, त्यामध्ये सातत्याने वाढ होत असून हे प्रमाण २० हजारांपर्यंत जाण्याची शक्यता वरिष्ठ अधिकाऱ्यांनी व्यक्त केली. शिंदे समिती येत्या काळात महत्त्वाचे १२ अभिलेख तपासणार असून त्यामधूनच २० हजारांपेक्षा अधिक नोंदी सापडण्याची शक्यता आहे.