अखेर म्हाडा भरती परीक्षा होणार ऑनलाइन

मुंबई : म्हाडा सरळसेवा भरती परीक्षेचा (MHADA Exam) पेपर फोडण्याचा कट उघड झाल्याने म्हाडाने ऐनवेळी परीक्षा रद्द केली. यानंतर विविध परीक्षा घेण्याचा अनुभव असलेल्या टीसीएस कंपनीची या परीक्षेसाठी निवड करण्यात आली असून या कंपनीमार्फत 1 ते 15 फेब्रुवारी दरम्यान ऑनलाइन पध्दतीने परीक्षा घेण्यात येणार असल्याचे म्हाडाने जाहीर केले आहे.

महाराष्ट्र गृहनिर्माण व क्षेत्रविकास प्राधिकरणाच्या (MHADA) आस्थापनेवरील विविध 14 संवर्गातील 565 रिक्त पदे भरण्यासाठी जीए सॉफ्टवेअर या कंपनीची निवड करण्यात आली होती. या कंपनीच्या वरिष्ठ अधिकाऱ्याने गुप्ततेचा भंग करत पेपर फोडण्याचा कट रचल्याचे समोर येताच म्हाडाने 12 ते 20 डिसेंबर या कालावधीत आयोजित केलेली परीक्षा ऐनवेळी रद्द केली. या वादावर पडदा टाकण्यासाठी गृहनिर्माण मंत्र्यांनी भरती परीक्षा म्हाडा स्वतः घेईल असे जाहीर केले. मात्र म्हाडा प्रशासनामार्फत पावणे तीन लाख उमेदवारांची परीक्षा घेणे अशक्य असल्याने अखेर विविध परीक्षांचा अनुभव असलेल्या टीसीएस कंपनीमार्फत परीक्षा घेण्याचा निर्णय घेण्यात आला.

यापूर्वी भरती परीक्षा ऑफलाइन पद्धतीने घेण्यात येणार होती. यामुळे म्हाडाच्या निर्णयावर उमेदवारांकडून नाराजी व्यक्त करण्यात येत होती. उमेदवारांची मते लक्षात घेऊन म्हाडाने अखेर 1 ते 15 फेब्रुवारी दरम्यान ऑनलाइन पद्धतीने परीक्षा घेण्याचा निर्णय घेतला आहे. या परीक्षेचे तपशीलवार वेळापत्रक व अन्य सूचना म्हाडाच्या संकेतस्थळावर जाहीर करण्यात येतील, असे म्हाडाने अधिकाऱ्याने सांगितले.