Shrikant Shinde : 'एक बार जो हमने कमिटमेंट कर दी, तो हम किसी की भी नही सुनते..'; खासदार शिंदेंचा ठाकरेंना टोला

मुरगूड : ‘एक बार जो हमने कमिटमेंट कर दी, तो हम किसी की भी नही सुनते.., हे आम्हा शिंदे कुटुंबीयांचे तत्त्व आहे. या आधी तुम्ही एका युवा नेत्याला कार्यक्रमासाठी बोलावले होते, पण ते आले नाहीत. त्यामध्ये आमची तुलना व्हायला नको. म्हणून आजारी असतानादेखील मी आलो आहे,’ असा टोला खासदार डॉ. श्रीकांत शिंदे (Dr. Shrikant Shinde) यांनी आदित्य ठाकरे (Aditya Thackeray) यांचे नाव न घेता लगावला.

येथील (Murgud) सदाशिवराव मंडलिक महाविद्यालयाच्या संजयदादा यूथ फेस्टिव्हलमध्ये लोकनेते सदाशिवराव मंडलिक सांस्कृतिक मंचचे उद्‌घाटन खासदार शिंदे यांच्या हस्ते झाले. त्याप्रसंगी आयोजित कार्यक्रमात ते बोलत होते. खासदार संजय मंडलिक अध्यक्षस्थानी होते. यावेळी आमदार प्रकाश आबिटकर, युवा सेनेचे किरण साळी, प्राचार्य डॉ. अर्जुन कुंभार, ॲड. वीरेंद्र मंडलिक आदी प्रमुख उपस्थित होते.

खासदार शिंदे म्हणाले, ‘युवकांना चांगल्या प्रकारची व्यासपीठे मिळवून देण्याचे काम करणे गरजेचे आहे. प्रत्येकाने प्रामाणिकपणे काम केल्यास ध्येय गाठता येते. त्यासाठी प्रयत्न आणि सातत्य महत्त्वाचे आहे.’

खासदार संजय मंडलिक म्हणाले, ‘युवकांना रोजगाराच्या संधी उपलब्ध करून देण्याचे काम खासदार श्रीकांत शिंदे यांनी आपल्या फाउंडेशनच्या माध्यमातून केले आहे.’ आमदार आबिटकर म्हणाले, ‘युवकांना वेगवेगळ्या संधी उपलब्ध करुन देण्याचे काम खासदार मंडलिक करत आहेत.’