MPSC परिक्षेचा निकाल जाहीर; प्रमोद चौगुले राज्यात पहिला

मुंबई : महाराष्ट्र लोकसेवा आयोगातर्फे घेण्यात आलेल्या राज्यसेवा मुख्य परीक्षा २०२० चा निकाल जाहीर करण्यात आला असून, प्रमोद चौगुले हा राज्यात प्रथम आला आहे. तर, निलेश कदम दुसरा तर, रुपली माने हिने तिसरा क्रमांक पटकावला आहे. विशेष म्हणजे मुलाखती संपल्यानंतर अवघ्या दोन तासात राज्यसेवा परीक्षेचा निकाल जाहीर करण्यात आला आहे. राज्यात प्रमोद बाळासाहेब चौगुले ६१२.५० गुण संपादन करीत पहिल्या क्रमांकावर आहे. तर नीतेश नेताजी कदम ५९१.२५ गुण मिळवत दुसऱ्या क्रमांकावर आहे. राज्यात तिसरी आणि महिलांमध्ये पहिला येण्याचा मान रूपाली गणपत माने हीने ५८०.२५ गुणांवर मिळविला आहे.

आयोगाने ५९७ उमेदवारांची गुणवत्ता यादी घोषित केली आहे. आजवरच्या आयोगाच्या इतिहासातील हा पहिला जलद गतीने लागलेला निर्णय आहे. ज्यामध्ये मुलाखती पार पडल्या त्याच दिवशी अवघ्या दोन तासात अंतिम निकाल जाहीर केला आहे. आयोगाने आपल्या कार्यपद्धतीत केलेल्या बदलाचा हा परिणाम आहे. मागील महिन्यातही ज्या परीक्षांच्या मुलाखती झाल्या. त्याच दिवशी त्यांचे निकाल घोषित करण्यात आले आहे.

गेल्या काही महिन्यांपासून महाराष्ट्र लोकसेवा आयोगावर सातत्याने टीका करण्यात येत होती. एवढेच नव्हे तर, आयोगाकडून दिलेल्या वेळेत परिक्षा घेतल्या जात नाहीत. तसेच परिक्षा गेतल्यास त्याचा निकाल लावला जात नाही अशा प्रकारच्या टीका लोकसेवा आयोगावर आणि राज्य सरकारवरदेखील केल्या जात होत्या. त्यानंतर आपली कार्यशैली बदलण्यावर आणि ते गतीमान करण्याचं आव्हान आयोगासमोर होतं. त्यानंतर आज मुलाखतींच्या अवघ्या दोन तासांनंतर कामाची शैली बदलली असल्याचे महाराष्ट्र लोकसेवा आयोगाच्या निकालानंतर दिसून येत आहे.