विधानसभा अध्यक्षपद निवडणूक : मविआचे मंत्री घेणार राज्यपालांची भेट

मुंबई : सध्या राज्य विधीमंडळाचं अर्थसंकल्पीय अधिवेशन सुरु असून या अधिवेशनात विधानसभा अध्यक्षपदाची निवडणूक व्हावी, यासाठी आता महाविकास आघाडी सरकारमधील मंत्री राज्यपाल भगतसिंह कोश्यारी (Bhagat Singh Koshyari) यांची भेट घेणार आहेत. आज (सोमवार) संध्याकाळी ६ वाजता हे मंत्री राज्यपालांच्या भेटीला जाणार आहेत. (MVA govt Minister to meet Governor for Assembly Speaker Election)

यंदाच्या अधिवेशनात विधानसभा अध्यक्षाची निवड व्हावी ही सरकारची आग्रही मागणी आहे. त्याचसाठी राज्यपालांनी वेळ द्यावा, अशी विनंती या मंत्र्यांकडून राज्यपालांना करण्यात येणार आहे. या मंत्र्यांच्या शिष्टमंडळामध्ये उपमुख्यमंत्री अजित पवार, मंत्री अशोक चव्हाण यांचा समावेश असणार आहे. गेल्या हिवाळी अधिवेशनात यासंदर्भातील सर्व प्रक्रिया सरकारकडून पूर्ण झाली होती. मात्र राज्यापलांनी यावर कोणताही निर्णय घेतला नव्हता.

दरम्यान, गेल्या आठवड्यात महाविकास आघाडीच्या नेत्यांनी राज्यपालांची यासंदर्भात भेट घेतली होती. तेव्हा राज्यपाल सकारात्मक असून लवकरच निवडणुकीची तारीख देतील असं त्यांनी माध्यमांशी बोलताना सांगितलं होतं. त्यानंतर पुन्हा एकदा याची आठवण करुन देण्यासाठी मंत्र्यांचं शिष्टमंडळ राज्यपालांची भेट घेणार आहे.

विधानसभा अध्यक्षांची निवडणूक आवाजी मतदानानं घेण्याच्या प्रक्रियेवर राज्यपालांची सहमती नाही. त्यामुळं विधानसभा अध्यक्षपदाची निवडणूक रखडलेली आहे. यापार्श्वभूमीवर या अधिवेशनात अध्यक्षपदाची निवडणूक पार पडण्याचा आशा सरकारला आहे, त्यामुळं आजची बैठक महत्वाची ठरणार आहे.